ଦୀପାବଳି

ବରଷକେ ଥରେ ଆସଇ ଚାଲି,               

 ଆଲୁଅର ପରବ ଦୀପାବଳି |           

ନୂଆ ଜାମା ପିନ୍ଧି ବାଣ ଫୁଟାନ୍ତି,                

ଘରେ ଘରେ ସବୁ ଦୀପ ଜାଳି |         

 ଲିଚୁ ଲାଇଟରେ ଦୋକାନ ବଜାର,            

   ଘରଦ୍ୱାର ସବୁ ଶୋଭା ପାଏ,          

 ମିଠା, ପିଠା, କ୍ଷୀରି ସୁସ୍ୱାଦୁ ଖାଦ୍ୟରେ,           

 ସଭିଙ୍କର ମନ ଭରିଯାଏ |            

 ନାନା ପ୍ରକାରର ବାଣ ଫୁଟାଯାଏ,               

 କୁମ୍ପି, ଆଲୁଅ ଓ ସୁରୁସୁରି,        

    ତାଳପତ୍ର ଆଉ ରିଲ, ଚିତା ସହ,             

   ସାପ, ବୋମା ଆଉ ଦିଆସିଲି |         

ଟୁନାଟୁନି, ଅଜା ସଭିଏଁ ଫୁଟାନ୍ତି,               

 ଆନନ୍ଦରେ ଦେଇ କରତାଳି,           

 ବିଦାୟ ଦିଅନ୍ତି ପିତୃ ପୁରୁଷଙ୍କୁ ,             

  କାଉଁରିଆ କାଠି, ଦୀପ ଜାଳି |         

 ସହର ବଜାରେ ସାଜସଜା ସହ,            

  ପୂଜା ପାଉଥାନ୍ତି ମହାକାଳୀ,          

   ରୋଗ, ଶୋକ, ଦୁଃଖ ଦୁରକରି ମା'        

     କରନ୍ତୁ ସଭିଙ୍କୁ ଶକ୍ତିଶାଳୀ |            

 ଖୁସିରେ, ଖୁସିରେ ଚାଲିଯାଏ ସିନା,              

ଦୀପାବଳି ଦିନ ମଜାକରି,             

ବାୟୁମଣ୍ଡଳ ଯେ ପ୍ରଦୂଷିତ ହୁଏ,              

 ନଜର ନ ଥାଏ କାହାରି |           

   କେତେ ଜୀବଜନ୍ତୁ ଅଣନିଶ୍ୱାସୀରେ,          

   ରୁନ୍ଧି ସୁନ୍ଧି ହୋଇ ଯାନ୍ତି ମରି,           

 କେଉଁ ଖୁସି ଅବା ପାଉଛି ମାନବ,              

ମନଇଛା ଏତେ ବାଣ ଜାଳି |            

 ଆମ ପରିବେଶ ପ୍ରଦୂଷଣ ମୁକ୍ତ,              

  ଆମରି ହାତରେ ଅଛି ସିନା,          

 ଆମେ ନ ମାନିଲେ ଆମ ଜୀବନ ହିଁ,          

    ହନ୍ତସନ୍ତ ହେବ ବାୟୁ ବିନା |            

ତେଣୁ ହେ ପାଠକ ଆନନ୍ଦର ପର୍ବ,             

   ଆନନ୍ଦରେ ଦିଅ ଦୀପଜାଳି,        

  ବନ୍ଦ କରିଦିଅ ବାଣଫୁଟା ତୁମେ,              

  ଆନନ୍ଦ ହୋଇବ ଦୀପାବଳି |