ଦିବ୍ୟାମୃତ

ହୃଦୟ ମନ୍ଦିରେ କନକ ବେଦୀରେ

ବାଇଶି ପାବଛ ଡେଇଁ

ଆସ ପ୍ରଭୁ ବାରେ ଭକ୍ତି ସବାରୀରେ

ଆଶିଷ ଆଞ୍ଜୁଳା ନେଇ ll

ମନ ବଡ଼ଦାଣ୍ଡେ ଦେଖା ଦିଅ ଦଣ୍ଡେ

ଅନୁପମ କାହ୍ନା ବେଶେ

ତଵ ସ୍ପର୍ଶ ରେଣୁ ଭରି ଯିବ ତନୁ

ଅପୂର୍ଵ ମାଦକ ଦୃଶ୍ୟେ ll

ଉପମା ତୁମର ତୁମ ବଂଶୀ ସ୍ୱର

ଆର୍ଦ୍ର କରୁ ପ୍ରତି କ୍ଷଣେ

ପ୍ରକୃତି ପୁରୁଷ ହେଉ ସମାବେଶ

ଭକ୍ତି ସୁଧା ବୃନ୍ଦାବନେ ll

ନଥିବ ଯେଉଁଠି ମିଛ ମାୟା ଗଣ୍ଠି

ମାନବିକ ବିଶ୍ଲେଷଣ

ପଡ଼ୁ ପୂର୍ଣ୍ଣଛେଦ ନହେଉ ଦୁର୍ଭେଦ୍ୟ

ତଵ ଚିନ୍ତା ଅମଳିନ ll

ପ୍ରୀତି ପୀୟୂଷରେ ତୁମ ଭକ୍ତି ନୀରେ

ପ୍ରସ୍ଫୁଟିତ ହେଉ ଧରା

ଚତୁର୍ଦ୍ଧା ମୂରତୀ ଦିଅହେ ବିରତି

ସାଂସାରିକ ପରମ୍ପରା ll

ମହାବାହୁ ତୁମେ ରଖ ତୁମ ପ୍ରେମେ

ଅହଃର୍ନିଶୀ ଅବିଶ୍ରାନ୍ତେ

ମୋହ ରଣାଙ୍ଗନେ ମାନସ ଅଙ୍ଗନେ

ଭାବ ଭକ୍ତି ଭରା ପଥେ ll

ହାତ ଧରି ମୋର ନିଅହେ ଈଶ୍ୱର

ସତ୍ୟ ଧର୍ମ ସଂହତିରେ

ଛାଡ଼ି ଅହଂକାର ଧରି ଓଁକାର

ଦିବ୍ୟାମୃତ ଚିନ୍ତନରେ ll