ଦିଅ ମା' ଐଶ୍ୱର୍ଯ୍ୟ ଭରି
ଦିଅ ମା' ଐଶ୍ୱର୍ଯ୍ୟ ଭରି
ଭାଦ୍ରବ ମାସର ଶୁକଳ ପଞ୍ଚମୀ
ଶୁଭଲଗ୍ନ ଆମ ପାଇଁ
ବରଷକେ ଥରେ ଆସିଅଛି ଆଜି
ଗଣପର୍ବ ନୂଆଖାଇ ।
ଭକତି ବିଶ୍ବାସେ ଶୁଦ୍ଧ ଚିତ୍ତ ମନେ
କରୁଅଛୁ ସମର୍ପଣ
ଶରଧା ବଳାଇ ଘେନାକର ମାଆ
ନୈବେଦ୍ୟ ଭୋଗ ନବାନ୍ନ ।
ତୁମ ଅନୁଗ୍ରହେ ହୁଅଇ ଉତ୍ପନ୍ନ
ଫଳମୂଳ ଖାଦ୍ୟଶସ୍ୟ
ଉନ୍ମେଷେ ଜୀବନ ତୁମରି ପ୍ରସାଦୁ
ଫୁଟେ ମୁଖେ ମଧୁ ହାସ୍ୟ ।
ହୋଇ ଯୋଡ଼ହସ୍ତ କରୁଛୁ ପ୍ରାର୍ଥନା
ସବିନୟ ନିବେଦନ
ଉଲ୍ଲସୁ ପରାଣ ବିକଶୁ ଜୀବନ
ମଧୁମୟ ଅନ୍ନବ୍ରହ୍ମ ।
ନିର୍ଝରୁ ମମତା ସରସ ସୁନ୍ଦର
ମୈତ୍ରୀ ପ୍ରୀତି ସଦ୍ଭାବନା
ପ୍ରବହୁ ଅମୃତ ମଧୁର ନିର୍ଯ୍ୟାସ
ସ୍ନେହ ପ୍ରେମ ସଙ୍କଳ୍ପନା ।
ତୁମେ ଆଦିଶକ୍ତି ଜଗତ ଜନନୀ
ଅମୃତର ଅଧୀଶ୍ୱରୀ
ଦିଅ ଶୁଭାଶିଷ ସୁଖ ଆଉ ଶାନ୍ତି
ଦିଅ ମା'ଐଶ୍ୱର୍ଯ୍ୟ ଭରି ।