ଦି ଟୋପା ଲୁହ

ଦି ଟୋପା ଲୁହ, ଦୁଇଟି ଆଖିରେ 

ନାଇଛି କଜଳ ଭାବି

ମନର କୋହକୁ ଲୁଚାଇ ଅନ୍ତରେ

ମିଛରେ ହସୁଛି ଆଜି ।

ଦୁନିଆଁ ଦେଖିଛି ଅଧରେ ମୋ ହସ

ମନ ତ ଦେଖିନି କିଏ !

ମନର ଭାବକୁ ଲୁହର ଭାଷାରେ

ଆଖି ମୋର କହି ଦିଏ ।

ହସ ତ ଅଟଇ ମୃଗତୃଷ୍ଣା ପରି

ଏବେ ଅଛି ଏବେ ନାହିଁ,

ଲୁହ ଅଟେ ସାଥି ସାରା ଜୀବନର

ସୁଖେ ଥାଇ, ଦୁଃଖେ ଥାଇ ।

ଆନନ୍ଦେ ଝରଇ, ଦୁଃଖେ ବି ଝରଇ

ଛାଡ଼ି ତ ନ ଯାଏ କେବେ,

ତଥାପି କାହିଁକି ଲୁହ ଠାରୁ ହସ

ସଭିଁଙ୍କ ମନକୁ ଲୋଭେ !

ଜୀବନେ ତ ମୋର ସୁଖ ବି ଯେତିକି

ଅଛି ବି ସେତିକି କୋହ ,

ଶୂନ୍ୟ ଜୀବନେ ମୋ ଚିର ସାଥି ସିଏ

କେବଳ ଦି ଟୋପା ଲୁହ ।।