ଧରାବତରଣ
ଧରାବତରଣ
ଅବ୍ୟକ୍ତ ଚିନ୍ମୟ ଅବୟାବ ବିଶିଷ୍ଟା
ସୂକ୍ଷ୍ମାତିସୂକ୍ଷ୍ମ ଦିବ୍ୟଶକ୍ତିରେ ପରିପୂର୍ଣ୍ଣା
କରୁଛନ୍ତି ଜଗଜ୍ଜନନୀ ଧରାବତରଣ
ବିହ୍ୱଳ କରି ମହାପଞ୍ଚଭୂତ ।
ଶାରଦୀୟ ପବନେ ଦୋଳାୟିତ ହୁଏ କାଶତଣ୍ଡୀ
ଅପୂର୍ବ ଧବଳ ଶୀତଳ ରୂପକୁ ନେଇ
ତାଙ୍କରି ଆଗମନି ବାର୍ତ୍ତା ଦେଇ
ଆର୍ତ୍ତ ତୃଷିତ ପରାଣେ ଅମୃତ ଦିଏ ଭରି ।
ଉଛୁଳି ପଡୁଛି ଅଣୁପରମାଣୁ
ମହିମାମୟୀଙ୍କ ଦରଶନ ପାଉ ପାଉ
ଅଚିନ୍ତ୍ୟର ସ୍ଥୂଳ ପରିପ୍ରକାଶକୁ ଦେଖି
ଲାଳାୟିତ ସଭିଏଁ ଟିକିଏ ପରଶ ପାଇବା ପାଇଁ ।
ଘଣ୍ଟଘଣ୍ଟା ଶଦ୍ଦେ ମେଦୀନି କମ୍ପଇ
ନାଚେ ତାଳେ ତାଳେ ଦେହ ମନ ପ୍ରାଣ ଆଜି
ଝୁଣା କର୍ପୁର ଅଗୁର ବାସ୍ନା ଚହଟେଇ
ପ୍ରକୃତିମୟୀ ଆସିଛନ୍ତି ମାତୃମୟୀ ରୂପ ନେଇ ।
କେବେ ମହାମାୟା କେବେ ଯୋଗମାୟା
ପ୍ରାକୃତ ଅପ୍ରାକୃତ ସବୁ ତାଙ୍କ ଲୀଳାଖେଳା
ତତ୍ତ୍ଵମୟୀ ସେ , କେବେ ପୁଣି ପ୍ରେମମୟୀ
ନିହାତି ଦୁର୍ବୋଧ୍ୟା ପୁଣି ଅତ୍ୟନ୍ତ ସହଜ ସରଳା ।