ଧନ୍ୟ ଧନ୍ୟ ତୁମ୍ଭେ ବିପ୍ର ବିଦ୍ୟାପତି

ଧନ୍ୟ ଅଟ ଧନ୍ୟ ଅଟ ବିପ୍ର ବିଦ୍ୟାପତି l

ବିଷ୍ଣୁ ଭକ୍ତ ଅବନ୍ତୀର ଧନ୍ୟ ମହାମନ୍ତ୍ରୀ ll

ଅବନ୍ତୀ ନୃପତି, ମହାରାଜା ଇନ୍ଦ୍ରଦ୍ୟୁମ୍ନ l

ଆଦେଶ ପାଇ ଉତ୍କଳ କଲ ଆଗମନ ll

ପୁଣ୍ୟ ଭୂଇଁ ଏ ଉତ୍କଳେ ବିଷ୍ଣୁଙ୍କ ବସତି l

ଗିରି କନ୍ଦରରେ କାହିଁ ଶବରେ ପୁଜନ୍ତି ll

ମହାବିଷ୍ଣୁଙ୍କର ତୁମ୍ଭେ କରି ଯଥା ଠାବ l

ଖବର ପାଇବ ଯାଇ ନୃପତିଙ୍କୁ ଦେବ ll 

ବହୁ ଶ୍ରମ କରି ଯାଇ ଶବର ପଲ୍ଲୀରେ l

ଦିନ ବିତାଇଲ ଯାଇ ବିଶ୍ୱାବସୁ ଘରେ ll

ଗୁପ୍ତ ବାସ କରିଛନ୍ତି ପ୍ରଭୁ ସେହିଠାରେ l

ଶବର ପୁଜଇ ତାଙ୍କୁ ଅତି ଭକ୍ତି ଭରେ ll

ପ୍ରଭୁଙ୍କ ସନ୍ଧାନ ଆଉ କିଏ ପୁଣି ଦେବ l

ଶବର ଲଳନା ସଙ୍ଗେ କଲ ପ୍ରିତିଭାବ ll

ନିରୀହା ଶବର ଝିଅ ନାମ ତା ଲଳିତା l 

ଦର୍ଶାଇଲା ବିପ୍ର ବର ଅପୂର୍ବ ଦେବତା ll

ସନ୍ଦେଶକୁ ନେଇଗଲ ଅବନ୍ତୀକା ପୁଣି l

ହର୍ଷ ମହାରାଜ ଇନ୍ଦ୍ରଦ୍ୟୁମ୍ନ ତାହା ଶୁଣି ll

ଥାଟପାଟ ଧରି ରାଜା ଉତ୍କଳ ଅଇଲେ l

ନୀଳମଣି ବିଗ୍ରହଙ୍କୁ କାହିଁ ନପାଇଲେ ll

ପ୍ରଭୁ ନାହାଁନ୍ତି କି ବିଶ୍ଵାବସୁ ଆଉ

Advertisement

ନାହିଁ l

ନିରାଶ ବସିଲେ ଯହୁଁ ଅବନ୍ତୀର ସାଇଁ ll

ତହୁଁ ଅବନ୍ତୀପତିଙ୍କୁ ଶୂନ୍ୟବାଣୀ ହେଲା l

ଦାରୁରୂପେ ସମୁଦ୍ରରେ ଭାସୁଛି ମୁଁ ଭଲା ll

ମହାରଣା କାହୁଁ ଏକ ମିଳି ଗଲେ ଆସି l

ଅତି ବୃଦ୍ଧ ଧରି ହାତେ ନିହାଣ ବାରିସି ll

ମୂର୍ତ୍ତି ଗଢ଼ି ଦେଇଗଲେ ହସ୍ତପଦ ହୀନ l

ବିଶ୍ଵକର୍ମା କାହିଁଗଲେ ନମିଳେ ସନ୍ଧାନ ll

ବ୍ରହ୍ମାଙ୍କୁ ବରଣ କରି, ଆଣିଲେକ ରାଜା l

ଚତୁର୍ଦ୍ଧା ବିଗ୍ରହ ସ୍ଥାପି ଆରମ୍ଭିଲେ ପୂଜା ll

ଧନ୍ୟ ବିପ୍ରବିଦ୍ୟାପତି ରାଜା ଇନ୍ଦ୍ରଦ୍ୟୁମ୍ନ l

ଧନ୍ୟ ଲଳିତା ଗୁଣ୍ଡିଚା ତୁମ୍ଭ ପତ୍ନୀ ଗଣ ll

କାଳ କାଳ ତୁମ୍ଭ କୀର୍ତ୍ତି ରହିବ ଜଗତେ l

ଶ୍ରୀମନ୍ଦିର ଶିରିକ୍ଷେତ୍ର ବୈକୁଣ୍ଠ ମରତେ ll 

ଧନ୍ୟ ତୁମ୍ଭର ଦାୟାଦେ ବିପ୍ର ବିଦ୍ୟାପତି l

ଦୈତାପତି, ପ୍ରଭୁଙ୍କର ସେବା କରୁଛନ୍ତି ll

ନମଃ ନମଃ ଜଗନ୍ନାଥ ନୀଳାଦ୍ରୀ ମଣ୍ଡନ l

ନୀଳଚକ୍ରେ ବାନା ଉଡ଼େ ପତିତପାବନ ll

ନିଦ୍ରାଯାଅ ଶ୍ରୀଗୀତଗୋବିନ୍ଦ ଗାୟନରେ l

ଜୟ ଜୟ ଜଗଦୀଶ, ଜୟ ଜୟ ହରେ ll