ଧଳା ଭାଲୁ

ତୁନ୍ଦ୍ରା ଅଞ୍ଚଳର ଧଳା ଭାଲୁ ଦେଖି

ମନରେ ହେଲା ମୋ ଲୋଭ

ପାଳିବାକୁ ଘରେ ଇଚ୍ଛା କଲି ମୁହିଁ

ଲଗାଇଲି ସଙ୍ଗେ ଭାବ ।

ରୂପଟି ଧବଳ ଶରୀର କୋମଳ

ଦେଖି ମନ ଶାନ୍ତ ହେଲା

ଶାନ୍ତିର ପ୍ରତୀକ ତା ରୂପ ରଙ୍ଗରେ

ମନ ମୋର ଲୋଭ କଲା ।

ଧଳା ଭାଲୁ ସିନା ଆଣିଲି ଘରକୁ

ଦେବାକୁ ପଡ଼ିଲା ସେବା

ବରଫ ବୋହିବା ଦୁଃଖ ନସରିଲା

ଦେଖି ଲୋକ ହେଲେ କାବା ।

ଉଷୁମ ମଣ୍ଡଳେ ଘର ତୋଳି ଧନ 

ତୁନ୍ଦ୍ରାଞ୍ଚଳେ କଲୁ ଭାବ

ତତଲା ହାଣ୍ଡିରେ ପୁରାଇ ବରଫ

ଖୋଜୁଛି ମୁଁ ମୂର୍ଖ ଲାଭ ।

ଦେଖିବାକୁ ସିନା ଶାନ୍ତ ଲାଗୁଥିଲା

ନିତି ରମ୍ପା ମୁଁ ଖାଇଲି

ଖଣ୍ଡିଆ ଖାବରା ହୃଦୟ ଉପରେ

ମଲମ ନିତି ଲେପିଲି ।

ନିଜ ପରିବେଶ କଥା ମନେରଖି

ଘରକୁ ଆଣିବ ଜୀବ

ତୁନ୍ଦ୍ରା ଅଞ୍ଚଳର ଧଳା ଭାଲୁ ରମ୍ପା 

ଖାଇବା କମ୍ ନୋହିବ ।