ଧବଳ କପୋତ
ଧବଳ କପୋତ
ଇର୍ଷାରେ ଅବିରତ ଢାଳେ ଶ୍ୟାମ ଜିମ୍ବୁତ,
ମନ୍ଦିର କୋଠା ମୋ ବାସ,ପ୍ରାଚୁର୍ଯ୍ୟ ସଂକେତ।
ବଞ୍ଚୁଥାଏ କାତରେ ଦିନ ସହି କଷଣ ବହୁତ,
ମୁଁ ତ ସେହି ମସୃଣ ଶୁଭ୍ର କପୋତ ।
ସୌମ୍ଯତାର ଆକର୍ଷଣେ ବିଭୋର ଅନେକ,
ନବକୃତି ଭାବନାରେ ହଜାଇ କବି ,ଲେଖକ ।
ସଜାଇଥାନ୍ତି ପଞ୍ଜୁରୀ ବି କିଛି ନିର୍ଦୟୀ ଲୋକ ,
ମୁକ୍ତକରି ନୀଳନଭେ ମୁଁ କାଳେ ଶାନ୍ତିର ପ୍ରତୀକ ।
ବିଚ୍ଛୁରିତେ ଦାନା ଡାକନ୍ତି ସଧିରେ ପକ୍ଷୀ ପ୍ରେମୀକ,
ଭୁଞ୍ଜାଇ ମୋତେ ପ୍ରଭୂ କର୍ଣ୍ଣେ ପଡିବ କି ଡାକ !
ରାଜରାଣୀ ମାନଙ୍କ ସେବେ ଥିଲି ବଡ ସଉକ ,
ଖାଦ୍ୟ ବାସ ଦେଇ ପୋଷୁଥିଲେ ଲକ୍ଷାଧିକ।
ଯୁଦ୍ଧ ବିରାମେ ହେଲି ପରା ଶାନ୍ତି ବାର୍ତ୍ତା ବାହକ,
ଗୁପ୍ତଚର ସାଥୀ ସହଯୋଗୀ ,ପ୍ରଜାଙ୍କ ରକ୍ଷକ ।
ସନ୍ଦେଶ ବହେ ରାଜକୁମାରୀ - କୁମର ପ୍ରେମୀକ,
କ୍ଷିପ୍ରତାରେ ଗହନେ ପଛେ ପକାଇ ଘୋଟକ ।
ଦେଇ ପ୍ରାଣବଳି, ତୋଷିଛି କେତେ ମାଂସ ଭକ୍ଷକ,
ବନ୍ଦୀ ହୋଇ କେବେ ବ୍ୟାଧଜାଲେ, କୁଟୁମ୍ବ ପୋଷକ ।
ଜନ୍ମିଥିଲି କାଳେ ଛୁଇଁବାକୁ ଫେନୀଳ ଉଦକ,
ଖଗ ଛୁଏଁ ମାଟି, ଶିତଳି କୃତେ କ୍ଷୁଧା ପାବକ ।
ଭରିଛି ବିହି ଏ ଜୀବନେ ବହୁ ଯାତନା ଓ ଶୋକ,
ନିଃଶେଷ କ୍ଷଣକେ ପୁଣି ଦୁର୍ଦ୍ଦାନ୍ତ ହସ୍ତେ ଫୁଟେ ବନ୍ଧୁକ।