Library
Profile
ଦେଶ କେଉଁ ସ୍ୱାଧୀନତା ପାଇଛି
ଦେଶ କେଉଁ ସ୍ୱାଧୀନତା ପାଇଛି
ବିକାଶର ଦିଗେ ମୁକ୍ତିର ପଥେ
ଦେଶ ଆଜି ଗତି କରୁଛି
ସ୍ୱାଧୀନତା ମନ୍ତ୍ରେ ସଭିଙ୍କ ମୁଖରେ
ଦେଖ ମୁଖରିତ ହେଉଛି
ଦେଶ ସ୍ଵାଧୀନତା ପାଇଛି
ମୁକ୍ତ ପକ୍ଷୀ ଆଜି ମୁକ୍ତ ଆକାଶେ
କିଛି କ୍ଷଣ ଘୂରି ବୁଲୁଛି
ଗୋଳା ବାରୁଦର ନିସାଣ ଆଗରେ
ଦିଗହରା ହୋଇ ଟଳି ଯାଉଛି
ଦେଶ କେଉଁ ସ୍ୱାଧୀନତା ପାଇଛି
ସ୍ୱାଧୀନତା ପାଇ ସ୍ଵାଧୀନ ଭାବେ ବଞ୍ଚିବାକୁ
ଆମ ସମ୍ବିଧାନ ଗଢା ହୋଇଛି
ତୁଳା ଦଣ୍ଡକରେ ଓଜନର ଭାର
କେବଳ ଗୋଟିଏ ଦିଗ ତଉଲୁଛି
ଦେଶ କେଉଁ ସ୍ୱାଧୀନତା ପାଇଛି
ସମ୍ବିଧାନ ଧାରାରେ ସଭିଙ୍କ ପାଖରେ
ସ୍ୱାଧୀନତା ବଳବତ୍ତର ରହିଛି
ତଥାପି ଝିଅଟେ ସ୍ଵାଧୀନ ଭାବରେ
ବୁଲିବାକୁ ଆଜି ଭାରି ଡରୁଛି
ଦେଶ କେଉଁ ସ୍ୱାଧୀନତା ପାଇଛି
ସ୍ୱାଧୀନତା ପୁଣି ସଭିଙ୍କୁ ସମ୍ମାନ ଦେବାରେ
ଦେଶରେ ଡିଣ୍ଡିମ ବାଜୁଛି
ନାରୀ ନିର୍ଯାତନା ଧର୍ଷଣକୁ ଦେଖିଲେ
ସ୍ୱାଧୀନତା ଉପରେ ସନ୍ଦେହ ଆସୁଛି
ଦେଶ କେଉଁ ସ୍ୱାଧୀନତା ପାଇଛି
ମୌଳିକ ଅଧିକାର ସମ୍ବିଧାନେ ଲିଖିତ
କେବଳ ଲେଖାରେ ହିଁ ପ୍ରକାଶ ପାଉଛି
ସ୍ୱାଧୀନତା ନାମେ ପରାଧୀନ ଭାବେ
ସବୁଠି ଅତ୍ୟାଚାର ଚାଲିଛି
ଦେଶ କେଉଁ ସ୍ୱାଧୀନତା ପାଇଛି
ଜାତି ଧର୍ମ ବର୍ଣ୍ଣ ସମ୍ପ୍ରଦାୟ ଭୁଲି
ଏକତା ସ୍ୱରେ ବଞ୍ଚିବା ଆହ୍ୱାନ ଶୁଭୁଛି
ନିଜ ସ୍ବାର୍ଥ ପାଇଁ ଲଢେ଼ଇ କରନ୍ତି
ଭାଇଚାରା ଧର୍ମାନ୍ଧତା ପାଖେ ବନ୍ଧା ପଡ଼ିଛି
ଦେଶ କେଉଁ ସ୍ୱାଧୀନତା ପାଇଛି
ସବୁଠାରେ ହସେ ହିଂସା ଦ୍ୱେଷ ମନୋଭାବ
ଆତ୍ମୀୟତା ଲୁଚି ଯାଇଛି
ସ୍ୱାର୍ଥପାଇଁ ଅନ୍ୟାୟ ଚକ୍ରାନ୍ତ କରନ୍ତି ଶତ୍ରୁତା
ମାନବିକତା ଉପହାସ କରୁଛି
ଦେଶ କେଉଁ ସ୍ୱାଧୀନତା ପାଇଛି
ଆମ ସମାଜରେ କମ୍ପାନୀର ଧାରା
ନିତି କେତେ କେତେ ଗଢା ଚାଲିଛି
କୋଟି କୋଟି ଟଙ୍କା ଲୁଟି ନେଇ ଚାଲି ଗଲେ
ଗରିବ ଚାଷୀଟା ଯେ ଆତ୍ମହତ୍ୟା କରୁଛି
ଦେଶ କେଉଁ ସ୍ୱାଧୀନତା ପାଇଛି
ନିୟମକୁ ଭାଙ୍ଗି ନିୟମ ଗଢ଼ିବା ପାଇଁକି
ସବୁଠାରେ ଲାଞ୍ଚ ବ୍ୟବସ୍ଥା ଚାଲିଛି
ଶୋଷଣକରି ଭରନ୍ତି ନିଜର ପାଣ୍ଠିକୁ
ଜନତା ସବୁ ଦେଖି ମୁକ ସାଜିଛି
ଦେଶ କେଉଁ ସ୍ୱାଧୀନତା ପାଇଛି
ଆଇନି ବ୍ୟବସ୍ଥା ସ୍ତର ମଧ୍ୟ ଦେଖ
କେତେ ଜାଗାରେ ଭୁଶୁଳି ପଡ଼ିଛି
ଦୋଷୀ ସ୍ୱାଭିମାନେ ବାଟ ଚାଲୁଅଛି
ନିର୍ଦ୍ଦୋଷ ଯେ ଦଣ୍ଡ ପାଉଛି
ଦେଶ କେଉଁ ସ୍ୱାଧୀନତା ପାଇଛି
ନୀତି ନିୟମକୁ କଳା ପଟି ବାନ୍ଧି
ସବୁଠି ବିକ୍ଷୋଭ ଚାଲିଛି
ଧଳା ପୋଷାକରେ କଳା କାରନାମା
ବେଶ୍ ବାରିହୋଇ ପଡୁଛି
ଦେଶ କେଉଁ ସ୍ୱାଧୀନତା ପାଇଛି
ଆଉ ସଂସ୍କୃତି ପରମ୍ପରା କ୍ରମେ କ୍ରମେ ଦେଖ
ଦେଶରୁ ଯେ ଲୋପ ପାଉଛି
ଆଧୁନିକତାର କୋମଳ ସ୍ପର୍ଶରେ
ସବୁକିଛି ଉଜୁଡି ଯାଉଛି
ଦେଶ କେଉଁ ସ୍ୱାଧୀନତା ପାଇଛି।
ଜାତୀୟ ପତାକାର ଶାନ୍ତି ମୈତ୍ରୀ ଭାବ
ସମ୍ମାନ କ୍ରମେ ଲୋପ ପାଉଛି
ଦେଶପ୍ରେମୀ ଆମ ସଂଗ୍ରାମୀ ମାନଙ୍କ
ବଳିଦାନକୁ ମଣିଷ ଭୁଲି ଯାଉଛି
ଦେଶ କେଉଁ ସ୍ୱାଧୀନତା ପାଇଛି
ତଥାପି ଗର୍ବରେ ମୁଁ ସ୍ଵାଧୀନ ବୋଲି
ଚିତ୍କାର କରି ଯେ କହୁଛି
ଜାତୀୟ ପତାକା, ସମ୍ବିଧାନ,ସଙ୍ଗୀତ, ସଂଗ୍ରାମୀ
ତାଙ୍କୁ ଶ୍ରଦ୍ଧାରେ ସମ୍ମାନ ଜ୍ଞାପନ କରୁଛି
ମୋ ଦେଶ ସ୍ୱାଧୀନତା ପାଇଛି
ହିଂସା ଦ୍ୱେଷ ଭୁଲି ଭାଇଚାରା ସମ୍ପର୍କେ
ବାନ୍ଧି ହେବାକୁ ଆହ୍ୱାନ କରୁଛି
ସଭିଙ୍କୁ ସମ୍ମାନ ମର୍ଯ୍ୟାଦା ଦେବାକୁ ଅନୁରୋଧ କରି
କିଛି ଆଶା ସମ୍ଭାବନା ରଖି ରହୁଛି
ମୋ ଦେଶ ସ୍ୱାଧୀନତା ପାଇଛି
ଗର୍ବରେ ଛାତି ଫୁଲେଇ କହୁଛି
ମୋ ଦେଶ ସ୍ୱାଧୀନତା ପାଇଛି
