Library
ଦେବଦାସୀ ହେବି କଳାଠାକୁର
ଦେବଦାସୀ ହେବି କଳାଠାକୁର
କଳାଠାକୁର ମୋ କଳାଠାକୁର
ମୋ ଜୀବନ ଧନ ତୁମେ ମୋହର ॥୧॥
ଏ ପରାଣ ଦେଲି ତୁମକୁ ମୋର ।
ତୁମେ ମୋର ସ୍ବାମୀ ଜୀବନାଧାର ॥୨॥
ଘୁଙ୍ଗୁର ବାନ୍ଧିଲି ପାଦରେ ମୋର ।
ଦେବଦାସୀ ହେବି କଳାଠାକୁର ॥୩॥
ଘୁଙ୍ଗୁରର ତାଳେ ତାଳେ ନାଚିବି ।
କାଳିଆ ତୁମର ମନ ମୋହିବି. ॥୪॥
ଏ ଜୀବନ ଧନ୍ୟ ହେବ ମୋହର ।
ଦେଖୁଥିବି ସଦା ଶ୍ରୀରଙ୍ଗାଧର ॥୫॥
ବାଜା ପଖଉଜ ବାଜିବ ଯେବେ ।
ତୁମରି ଆଗରେ ଥିବି ମୁଁ ତେବେ ॥୬॥
ପାଦ ମୋ ପଡିବ ବାଜା ତାଳରେ ।
ଘୁଙ୍ଗୁର ଶବଦ ତୁମ କାନରେ ॥୭॥
ନାଚୁଥିବି ତୁମ ମୁହଁକୁ ଚାହିଁ ।
ତାଳ ଭଙ୍ଗ ହେବାକୁ ଦେବି ନାହିଁ ॥୮॥
ଚକାନୟନକୁ ଘାରିବ ନିଦ ।
ଗୀତ ଗୋବିନ୍ଦ ପଦାବଳୀ ଛନ୍ଦ ॥୯॥
ବାଜିଲେ କାନରେ ଲାଗିବ ନିଦ ।
ପଡିବ ପହଡ କଳାଗୋବିନ୍ଦ ॥୧୦॥
ଭାବ ବିନୋଦିଆ ଭାବରେ ରହି ।
ଦେବଦାସୀ ହେବି କଳାଗୋସେଇଁ ॥୧୧॥
ତୁମ ଇଚ୍ଛାରେ ମୋ ଇଚ୍ଛାଟି ରହୁ ।
ତୁମ ସେବାରେ ମୋ ଜୀବନ ଯାଉ ॥୧୨॥
ବିନତି ମୋ ଶୁଣ କଳାଠାକୁର ।
ଘୁଙ୍ଗୁର ବାନ୍ଧିଲି ପାଦରେ ମୋର ॥୧୩॥
ଦେବଦାସୀ ହେବି କଳାଠାକୁର ।
ଆନ ଅଭିଳାଷ ନାହିଁ ମୋହର ॥୧୪॥
ଜୀବ ଥିବା ଯାଏଁ ସମର୍ପି ହେଲି ।
ତୁମ ନାମରେ ଘୁଙ୍ଗୁର ବାନ୍ଧିଲି ॥୧୫॥
ଗତି ମୁକ୍ତିଦାତା ତୁମେ ମୋହର ।
ମୁହିଁ ହେବି ଦେବଦାସୀ ତୁମର ॥୧୬॥
ଏବେ ଦେବଦାସୀ ନାହାନ୍ତି କେହି ।
ଚକାନୟନକୁ ନିଦ ତ ନାହିଁ ॥୧୭॥
ମୁଁ ତୁମର ଦେବଦାସୀ ହୋଇବି ।
ନାଚି ନାଚି ତୁମକୁ ଶୁଆଇବି ॥୧୮॥
ଥକିଯାଉ ପଛେ ପାଦ ମୋହର ।
ନାଚି ନାଚି ଆହେ ସାରଙ୍ଗଧର ॥୧୯॥
ଶୟନେ ସପନେ ଜାଗ୍ରତେ ଧ୍ୟାନେ ।
ସଦା ରହିବି ତୁମ ସନ୍ନିଧାନେ ॥୨୦॥
ଦେବଦାସୀ ଭାବେ କର ସ୍ବୀକାର ।
ଏତିକି ବିନତି କଳାଠାକୁର ॥୨୧॥
