ଦାୟିତ୍ୱବୋଧର ଜ୍ଞାନ
ଦାୟିତ୍ୱବୋଧର ଜ୍ଞାନ
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ଦାୟିତ୍ୱବୋଧର ଜ୍ଞାନ ନରହିଲେ
କାମ ହୁଏ ଅସଜଡ଼ା,
ଜୀବନର ମୂଲ ବୁଝି ହୁଏ ନାହିଁ
ମନ ହୁଏ ଘୋଡା ଚଢା । [୧]
ଅସଂଯତ ମନ, ମନମୁଖୀ ହୋଇ
ନୀତି ନିୟମକୁ ଭୁଲେ,
ସତ ପରାମର୍ଶ, ବିବେକର ବୋଲ,
ଏଡି ଦେଇ ବାଟ ଚାଲେ । [୨]
ମନର ବାଟଟି ବଡ଼ ଚିକ୍କଣିଆ
ପାଦ ଯାଏ ଖସି ଖସି,
ପଥ ଶେଷର ସେ ପଙ୍କିଳ ଗହ୍ବରେ
ଅବଶେଷେ ଯାଏ ଫସି । [୩]
ପାପ-ପଙ୍କ ଛିଟା ଦେହେ ବୋଳି ହୋଇ
କୁରୂପ ଦିଶେ ସ୍ୱରୂପ,
ଘୃଣା, ବଦନାମ, ଲେପ ମାଖି ପୁଣି
ଜୀବନ ହୁଏ ବିରୂପ । [୪]
ଅଳିକ ଜୀବନ କରିବାକୁ ଚାହଁ
ଯଦି ସରସ ସୁନ୍ଦର ,
ଦାୟିତ୍ୱବୋଧକୁ କର୍ତ୍ତବ୍ୟରେ ଯୋଡି
କରମ ସୁନ୍ଦର କର । [୫]
ଦାୟିତ୍ୱବୋଧଟି କରମର ଅତି
ଆପଣା, ଶୁଭଚିନ୍ତକ,
ଚଲାପଥେ କେବେ ଭରି ଦିଏ ନାହିଁ
ଲକ୍ଷ୍ୟଚ୍ୟୁତର କଣ୍ଟକ । [୬]
ମନଯୋଗୀ ହୋଇ, ବିବେକ ଜଗାଇ
ଚାଲିଲେ କରମ ପଥେ ,
ମନ ସନମାନ ମୁକୁଟ ଶେଷରେ
ଝଟକଇ ପରା ମାଥେ ? [୭]
ଆସ ଆଜି! ଆମ ଦୁର୍ଲ୍ଲଭ ଜୀବନ
ମାନ ନିରୂପଣ କରି ,
ଦାୟିତ୍ୱବୋଧରେ ଵିଵେକକକୁ ଯୋଡି
କରମଟି ଯିବା କରି । [୮]