ଦ୍ୱାଦଶ ଜ୍ୟୋତିର୍ଲିଙ୍ଗ ସ୍ତୁତି

ସୌରାଷ୍ଟ୍ରର ଉପକୂଳେ ପୂଣ୍ୟ ସିନ୍ଧୁ ତଟେ l

ବିଜୟ କରିଲ ଜ୍ୟୋତିର୍ଲିଙ୍ଗ ସୋମନାଥେ ll

ଶ୍ରୀ ଶୈଳ ପର୍ବତ ପରେ ଶ୍ରୀ ମଲ୍ଲିକାର୍ଜୁନ l

ପାର୍ବତୀ ମଲ୍ଲିକା ପୁଣି ଶଙ୍କର ଅର୍ଜୁନ ll

ମହାକାଳ ବୋଲାଇଲ ଅବନ୍ତୀ ନଗରେ l

ଓଁକାର ଅମଲେଶ୍ୱର ନର୍ମଦା ତଟରେ ll

ବୈଦ୍ୟନାଥ ନାମ ତୁମ୍ଭ ବାସ ଝାଡ଼ଖଣ୍ଡ l

ଦେଓଘରେ ବୋଲାଇଛ କଳିର ବଇଦ ll

ସହ୍ୟାଦ୍ରି ଶୈଳଶ୍ରେଣୀରେ ଡାକିନୀ ପର୍ବତ l

ଭୀମାଶଙ୍କର ନାମରେ ଭୀମକର୍ମା ଖ୍ୟାତ ll

ଦକ୍ଷିଣ ଦେଶେ ରହିଲ ନାମ ରାମେଶ୍ୱର l

ସେତୁବନ୍ଧେ ସଂସାରରୁ ଦୁଃଖୀ ପାରିକର ll

ଦ୍ୱାରିକା ପାରୁସେ ବନ ସେ ଅଟେ ଦାରୁକା l

ଦ୍ୱାରିକାଧିଶେ ନାଗେଶ ବାବା କରୁ ଦେଖା ll

ବାରାଣାସୀରେ ବସିଲୁ କାଶୀ ବିଶ୍ୱନାଥ l

ମଣିକର୍ଣ୍ଣିକା ଘାଟ ତୋ ସରଗକୁ ବାଟ ll

ତ୍ର୍ୟମ୍ବକେଶ୍ୱର ତୋ ବାସ ଗୌତମୀର ତଟ l

ପୂତନୀରା ଗୋଦାବରୀ ତୋ ପଦୁ ସମ୍ଭୁତ ll

ହିମାଳୟ ହୈମବତୀ ପିତ୍ରାଳୟ ପାଶେ l

କେଦାରେଶ୍ୱର ତୋହର କେଦାର ପ୍ରକାଶେ ll

ଓଉରଙ୍ଗାବାଦେ ବହି ନାମ ଘ୍ରୁଷ୍ଣେଶ୍ୱର l

ପାବନକରୁ ଐତିହ୍ୟ ଭୂମିକୁ ତାହାର ll

ଏହିପରି ଜ୍ୟୋତିର୍ଲିଙ୍ଗ ଅଟେ ବାର ଗୋଟି l

ଜ୍ୟୋତି ପ୍ରକାଶରେ ସର୍ବ ଅଜ୍ଞାନ ନାଶନ୍ତି ll

ଜ୍ୟୋତିର୍ଲିଙ୍ଗ ମହିମା କେ ବଖାଣେ ସମର୍ଥ l

ସପ୍ତ ଜନ୍ମ ପାପ ଖଣ୍ଡେ ସ୍ମର ସାୟଂ ପ୍ରାତଃ ll