ଚଉପଦୀ - ନନ୍ଦସୁତ ବଡ଼ ଛଇଳା

କବି - ଉପେନ୍ଦ୍ର ଭଞ୍ଜ

ପ୍ରିୟସହିରେ

ନନ୍ଦସୁତ ବଡ଼ ଛଇଳା । ପଦ ।

ଶୁଣ ଗୋ ସଙ୍ଗାତ

ଏ କି ବିପରୀତ

ନନ୍ଦସୁତ ବଡ଼ ଛଇଳା ।

ଯଶୋବନ୍ତ ନାରୀ

କି ମନେ ବିଚାରି

ଦିନେ ଆକଟି ନ କହିଲା । ୧ ।

ଦେବଶ୍ୱ ଅଇରି

ତାତ ଭ୍ରାତ ଧରି

ଭାନୁ ଜାନୁଯାନ୍ତେ ଦେଖିଲା ।

ଶିଖିନାଥମାତା

ବାହାନ ଠାଣିରେ

ଆଗେ ଉଭା ହୋଇ ରହିଲା । ୨ ।

ଚକ୍ରଧରାସୁତ

ଖସି ମୋ ଶ୍ରେଣୀରୁ

ମଥାରେ ପଡ଼ି ନାଶଗଲା ।

ଶହ ଦଶ ଯୋଗ

ଆରମ୍ଭ କରନ୍ତେ

ଏଗାର ମନେ ନ ସ୍ମରିଲା । ୩ ।

ମହୀ ଧରାଧର

ରିପୁଜାୟା ଭାବେ

ବିନୟରେ ମୋତେ କହିଲା ।

ନାହିଁ କରିବାରୁ

ବାଇ ପରି ହୋଇ

ପଣତ ଧରି ଓଟାରିଲା । ୪ ।

କଶ୍ୟପ କୁମର

ବଇରି ଭଣ୍ଡାରେ

ଇଙ୍ଗିତେ ଆସି ଚୁମ୍ବଦେଲା ।

ଶୁଣି ସେ ଭାରତୀ

ପ୍ରେମରୂପେ ମାତି

ଉପଇନ୍ଦ୍ର ଗୀତେ କହିଲା । ୫ ।