ଚଉପଦୀ-କି କହିବି ସେ ଘନଜଘନୀ ବେଦନା

କବି - ଗୌରହରି ପରିଚ୍ଛା

ରାଗ - ବୁଝାବତୀ ତାଳ - ଆଦିତାଳ

କି କହିବି ସେ

ଘନଜଘନୀ ବେଦନା (ମୋହନ)

ଦେଖିବା କ୍ଷଣି ଛାଡ଼ି

ଗଲା ମୋ ଚେତନା । ପଦ ।

ଶୁଣହେ ନିର୍ଦ୍ଦୟ ହରି ।

ତୁମ୍ଭ ନାମ ଧରି ଧରି ।

କାଳକୁ ନେଉଛି ସେ

କେତକୀ ବରନା । ୧ ।

ବିହ୍ୱଳିତ ତା ବଚନ ।

ଶୁଣିଲା କ୍ଷଣି ମୁଁ ଛନ୍ନ ।

ହୋଇ ଧାଇଁ ଆସିଲି

କହିବାକୁ ସିନା । ୨ ।

ପ୍ରାତଃ ସମୟର ଶଶୀ ।

ପରିରେ ଗଲାନି ଦିଶି ।

ଜମ୍ବୁନଦ ଜନିତ

ହାଟକ ବରନା । ୩ ।

ଅଶନ ବାସ ଭୂଷଣ ।

ହୋଇ ଗଲାନି ନିଊନ ।

କେବଳ କରୁଛୁ ତୁମ୍ଭ

ସଙ୍ଗେ ଭାବନା । ୪ ।

ଶ୍ରୀନିବାସ ରାଜମଣି ।

ସୁତ କହେ ସଖୀ ବାଣୀ ।

ଶୁଣି ମିଲିଲେ ଶ୍ରୀହରି

ହୋଇ ସୁମନା । ୫ ।