ଚଉପଦୀ - କି ଦେଖିଲି ବେଣୁପାଣିରେ
ଚଉପଦୀ - କି ଦେଖିଲି ବେଣୁପାଣିରେ
କବି - ଗୌରଚନ୍ଦ୍ର ଦେବ
ରାଗ -ପୁରୀ ତାଳ - ଆଦିତାଳ
କି ଦେଖିଲି ବେଣୁପାଣିରେ ।
ମିତଣୀ । ପଦ ।
କଳିନ୍ଦଜା କୂଳେ ।
ନୀପତରୁ ମୂଳେ ।
ଥିଲା ତ୍ରିଭଙ୍ଗିମା ଠାଣି । ୧ ।
ପୁରଟ ମୁକୁଟ ।
ଶିରେ ଝଟଝଟ ।
ପୁଚ୍ଛ ଗୁଚ୍ଛ ତାଏ ପୁଣି । ୨ ।
ତା କର୍ଣ୍ଣେ କୁଣ୍ଡଳ ।
ନାସା ମୋତିବାର ।
ଆହା କି ମନ୍ଦ ଦେଲାଣି । ୩ ।
ଚଳଚଳ ବେଣୀ ।
କୁଟିଳ ଚାହାଣୀ ।
ହୃଦୟ ଦେଲା ମୋ ହାଣି । ୪ ।
ଭାଲେ ଗୋରଚନା ।
ଅଧର ରଙ୍ଗିମା ।
ସ୍ମିତଯୁତ ମୃଦୁବାଣୀ । ୫ ।
ଗଳେ ତାର ହାର ।
ହୃଦେ ବନମାଳ ।
ନିନ୍ଦେ ଚେଳ ସୌଦାମିନୀ । ୬ ।
ଚରଣେ କିଙ୍କିଣି ।
ପ୍ରେମେ ଅନୁକ୍ଷଣି ।
ଶବ୍ଦ କରେ କିଣିକିଣି । ୭ ।
ସେ ଶ୍ୟାମଳ ତନୁ ।
ଅନାଉଁ ଅତନୁ ।
ଶର ବିନ୍ଧେ ମୋତେ ଟାଣି । ୮ ।
ଶ୍ରୀମତୀଙ୍କ ଭାବ ।
ଗୌରଚନ୍ଦ୍ର ଦେବ ।
ଗଜପତି ସଦା ଭଣି । ୯ ।