ଚରଣେ ଦିଅ ଶରଣ
ଚରଣେ ଦିଅ ଶରଣ
ବାଜେ ଘଣ୍ଟଘଣ୍ଟା ଢୋଲକ ମାଦଲ
ଆସିଛି ପାର୍ବଣ ପୂଜା
ଦିଶେ ଝିଲିମିଲି ରଙ୍ଗୀନ ଆଲୋକ
ମଣ୍ଡପ ହୋଇଛି ସଜ୍ଜା ।
ଦେବୀ ସନାତନୀ ଜଗତ ଜନନୀ
ପ୍ରକୃତି ଦେବୀ ଶାଶ୍ବତୀ
ଅବତର ଦୁର୍ଗେ ପରମ ଈଶ୍ୱରୀ
ଅକ୍ଷରା ମା ମହାଶକ୍ତି ।
ତବ ଆଗମନ ଶୁଭ ଅବସରେ
ଭକତ ଭାବ ବିହ୍ବଳ
ଉଛୁଳି ଉଠଇ ଆନନ୍ଦ ଉଲ୍ଲାସ
ଜୀବନ ଚଳଚଞ୍ଚଳ ।
ଆଶ୍ବିନ ମାସର ପରିତ୍ରାଣ ପକ୍ଷ
ପବିତ୍ର ଷୋହଳ ଦିନ
କୃଷ୍ଣ ଅଷ୍ଟମୀରୁ ଶୁକଳ ନବମୀ
ମହାଶକ୍ତି ସମ୍ମୁତ୍ଥାନ ।
ଶକ୍ତିପୀଠେ ହେବ ମହା ଷୋଳପୂଜା
ମହାସ୍ନାନ ବଳି ହୋମ
ମୃଣ୍ମୟୀ ପ୍ରତିମା ଘଟ ସଂସ୍ଥାପନ
ବିଧିରେ ସପ୍ତମୀ ଦିନ ।
ଦରଶନ ପାଇଁ ଲାଗଇ ଗହଳୀ
ଅଷ୍ଟମୀ ନବମୀ ଦିନ
ଉଚ୍ଚାରିତ ହୁଏ ମନ୍ତ୍ର ଶ୍ଳୋକ ସ୍ତୁତି
କମ୍ପେ ଗଗନ ପବନ ।
ଶକ୍ତି ସ୍ବରୂପିଣୀ ଦୁଷ୍ଟ ସଂହାରିଣୀ
ଦୁର୍ଗତି ନାଶିନୀ ଦୁର୍ଗେ
ଦିଅ ଗତି ମୁକ୍ତି କରୁଛୁ ମିନତି
ଅଭୟ ଶ୍ରୀପାଦପଦ୍ମେ ।
ଜଗତ ଜନନୀ କରୁଛୁ ଦୟିନୀ
ଦିଅ ସଦବୁଦ୍ଧି ଜ୍ଞାନ
ନାଶ କର ମାଆ ଅଜ୍ଞାନ ତିମିର
ଚରଣେ ଦିଅ ଶରଣ ।