ଚୋପାଛଡ଼ା ଲୋକ

ଚୋପାଛଡ଼ା ଲୋକ ଜୀରାରୁ ଶିରାକୁ କାଢ଼େ,

ଚୋପାଛଡ଼ା ଲୋକ କଥାରୁ ଅକଥା ବଢ଼େ !

ଚୋପାଛଡ଼ା ଲୋକ ଭାବୁଛି ନାଗକୁ ଧଣ୍ଡ,

ଚୋପାଛଡ଼ା ଲୋକ ମାପୁଛି ଗଭୀର ଗଣ୍ଡ !

ଚୋପାଛଡ଼ା ଲୋକ କଜିଆ ମଞ୍ଜିକୁ ବୁଣେ,

ଚୋପାଛଡ଼ା ଲୋକ ହଜିଆ ସମ୍ପତ୍ତି ଗଣେ !

ଚୋପାଛଡ଼ା ଲୋକ ସଭ୍ୟତା ଧରେନି ଧାର,

ଚୋପାଛଡ଼ା ଲୋକ ଅହନ୍ତା ମନରେ ଘୋର !

ଚୋପାଛଡ଼ା ଲୋକ ଆମ୍ବଡ଼ା ବୋଲୁଛି ଆମ୍ବ,

ଚୋପାଛଡ଼ା ଲୋକ ଓସାର ବତାଏ ଲମ୍ବ !

ଚୋପାଛଡ଼ା ଲୋକ ଚୁଗୁଲି ଚପଟେ ପଟୁ,

ଚୋପାଛଡ଼ା ଲୋକ ମାଗଣା ଗିଳିବା ପେଟୁ !

ଚୋପାଛଡ଼ା ଲୋକ ତାଳକୁ ଜାଣିନି ବାଗ,

ଚୋପାଛଡ଼ା ଲୋକ ବାଳକୁ ଛିଣ୍ଡାଏ ରାଗ !

ଚୋପାଛଡ଼ା ଲୋକ ଆକାଶୁ ପଡ଼ିକି ଖସେ,

ଚୋପାଛଡ଼ା ଲୋକ ମୂରୁଖ ପରିକା ହସେ !

ଚୋପାଛଡ଼ା ଲୋକ ସିଝାଇ ପାରେନି ଖଡ଼ା,

ଚୋପାଛଡ଼ା ଲୋକ ବାହାରେ ଦେଖାଏ ଆଡ଼ା !

ଚୋପାଛଡ଼ା ଲୋକ ଆଖିକୁ ଥାଇ ବି ଅନ୍ଧ,

ଚୋପାଛଡ଼ା ଲୋକ ଗନ୍ଧାଏ ଦେବାକୁ କାନ୍ଧ !

ଚୋପାଛଡ଼ା ଲୋକ ଜଟିଳ ଅଜ୍ଞାନ ମଥା,

ଚୋପାଛଡ଼ା ଲୋକ କୁଟିଳ ଗହନ ବ୍ୟଥା !

ଚୋପାଛଡ଼ା ଲୋକ ସମାଜ ବୃକ୍ଷକୁ ଥୁଣ୍ଟା,

ଚୋପାଛଡ଼ା ଲୋକ ଧରମ ସାକ୍ଷକୁ କଣ୍ଟା !