ଚନ୍ଦନପୁରର ନନ୍ଦନବନ

ଆସନ୍ତୁ ଦେଖିବା ଆମର ଗ୍ରାମ୍ୟ ଉପବନ,

ଖୁସୀରେ ବୁଲିବା ଏହି ସୁନ୍ଦର ନନ୍ଦନକାନନ,

ସବୁଜିମା ମନେ ପକାଏ ନନ୍ଦନନ୍ଦନଙ୍କ ବୃନ୍ଦାବନ,

ଯାହା ହେଉଛି ମଧୁର ସୁମଧୁର ଫଳପ୍ରଦ ମଧୁବନ |୧|

ପ୍ରାକୃତିକ ପରିବେଶରୁ ପୁଲକିତ ହୁଏ ଆନନ,

ସଦା ହୁଏ ଯେଉଁଠି ସୁଗନ୍ଧିତ ସୁମନଙ୍କ ଜନନ,

ପ୍ରଫୁଲ୍ଲିତ ଫୁଲ ଆନନ୍ଦିତ କରନ୍ତି ଆପଣା ମନ,

ନିରନ୍ତର ରଙ୍ଗୀନ କରେ ଯାହାକୁ ନୀଳ ଗଗନ |୨|

ଶୁଭୁଥାଏ ଯେଉଁଠି ବିଭିନ୍ନ ଅଭିନ୍ନ ବିହଙ୍ଗଙ୍କର ଗାନ,

କଳକଣ୍ଠ ମଧୁକଣ୍ଠ ଶୁଣାନ୍ତି ଶ୍ରାବ୍ୟ ପ୍ରତିଧ୍ୱନିତ ଗୁଞ୍ଜନ,

ସୁଭାଷିତ କୋଇଲି ଯେ ପାଇଛନ୍ତି ସୁବାସିତ ଆମ୍ରବନ,

ନିକୁଞ୍ଜର ଲତାରୁ ଅଳଙ୍କୃତ ହୁଏ ନୈସର୍ଗିକ ନନ୍ଦନବନ |୩|

ନୀଳାଚଳିଆଙ୍କ ପାଇଁ ଅଛି ଆମ ପାବନ ତୁଳସୀବନ,

ଅଛି ପୁଣି ଆରୋଗ୍ୟକାରକ ସଞ୍ଜୀବନୀ ବୃକ୍ଷଙ୍କ ବନ,

ଜନମାନସରେ ସଦା ଆସେ ସୌମ୍ୟ ସୌହାର୍ଦ୍ଦ ସ୍ପନ୍ଦନ,

ତେଣୁ ଅବଶ୍ୟ ଦେଖନ୍ତୁ ଆମ ଚନ୍ଦନପୁରର ନନ୍ଦନବନ |୪|