ଚକା ଆଖି
ଚକା ଆଖି
ଦେଲେ ତାକୁ ଦେଖି
ଆଖି ଯାଏ ଲାଖି
ସରିଯାଏ ଜୀବନର ଅସରନ୍ତି ଦୁଃଖ
ସେ ତ ଜଗତର ନାଥ
କାଳିଆ ସାଆନ୍ତ
କୃଷ୍ଣ କେଶବ ହରି କଳାଶ୍ରୀ ମୁଖ ll
କୋଟି ଜନମର
କଳୁଷ ପାପର
ନିମିଷକେ ଏ ଜୀବନୁ ହୋଇଯାଏ ଶେଷ
ମୁକତି ପସରା
ଆଶାର ଆଶରା
ଭରିଯାଏ ଅମୃତରେ କାଟି ପାପ ବିଷ ll
ଜନମର ସାକ୍ଷୀ ସେ ତ
ସେ ମରଣର ସାକ୍ଷୀ
ଶରଧାରେ ପ୍ରାଣ ଡାକେ ତାକୁ ଚକା ଆଖି
ନାହିଁ ପାଦ ପାଣି
ସେ ତ ଚକ୍ର ପାଣି
ଶୂନ୍ୟ ପାଦେ ନିବେଦଇ ମଥା ମୋର ରଖି ll
ତା'ର ପଦ ପାତେ
ଏ ଜୀବନ ସତେ
ସକଳ କଳୁଷ କାଟି ହୋଇଯାଏ ଧନ୍ୟ
ନୟନର କୋଣେ
ଲୋତକ ପରାଣେ
ଏ ଜୀବନେ ମିଳିଯାଏ କୋଟି କୋଟି ପୁଣ୍ୟ ll