ଚିତ୍ରପଟ

ଆମ ପ୍ରିୟ ବନ୍ଧୁ ପରିବାର ବର୍ଗ

ବଣଭୋଜି ଭେଟଘାଟ

ଭରିଦିଏ ମନେ ଆନନ୍ଦ ଉଲ୍ଲାସ

ବିଚ୍ଛେଦ ଦିଅଇ କଷ୍ଟ ।

ସୁଖ ଅବସର ଆସଇ ଜୀବନେ

ସୈ।ଭାଗ୍ୟକୁ କେବେ କେବେ

ମିଳଇ ସୁଯୋଗ ଏକାଠି ହେବାକୁ

ଆତ୍ମୀୟ ସ୍ୱଜନ ସର୍ବେ ।

କେତେ ଗପସପ ସୁଖ ଦୁଃଖ କଥା

ପରସ୍ପର ଆଲୋଚନା

କରିଥାଏ ଦିନ କେମିତି କେଜାଣି

ଟିକିଏ ଜଣା ପଡେନା ।

ମିଳନ ମୁହୂର୍ତ୍ତ ସୁମଧୁର ସ୍ମୃତି

ଧରିରଖେ ଚିତ୍ରପଟ

ତା ଉପରେ କେବେ ପଡ଼ିଲେ ନଜର

ହୁଅଇ ଚିତ୍ର ଜୀବନ୍ତ ।

ପ୍ରିୟ ପରିଜନ ପୋଷା ପଶୁ ପକ୍ଷୀ

ପ୍ରକୃତି ସୁନ୍ଦର ଦୃଶ୍ୟ

ଅବିକଳ ଭାବେ ହୁଏ ଉତ୍ତୋଳିତ

ଚିତ୍ରପଟେ ପରିଦୃଶ୍ୟ ।

ଆପଣା ପସନ୍ଦ ଚାରୁ ଚିତ୍ରପଟ

କରି ସୁଦୃଶ୍ୟ ବନ୍ଧେଇ 

ଟାଙ୍ଗିଥାନ୍ତି କେହି ବାସଗୃହ କାନ୍ଥେ

ସଜାଅନ୍ତି ଯତ୍ନ ଦେଇ ।

ନିରୋଳା ସମୟେ ଆଲବମ ଖୋଲି

ସାଉଁଟନ୍ତି ପୂର୍ବ ସ୍ମୃତି

ଅତୀତ କଥାକୁ ସ୍ମରନ୍ତି ମନରେ

ମିଳଇ ଅପାର ଶାନ୍ତି ।

  ------