ଚିତ୍ର ଚରିତ - 62 କବିତା : ଫୁଟିବ ମହତ ଗୁଣ

ସବୁ ମଣିଷର ଅଛି ହାତ-ଗୋଡ଼ ଆଖି-କାନ ପାଟି-ନାକ,

ସବୁ ଶରୀରରେ ରହିଛି ହୃଦୟ ରହିଛି ମନ-ବିବେକ |

ସବୁ ମଣିଷକୁ ସମାନ ସମୟ ପରିବେଶ ଜଳବାୟୁ ,

ସବୁ ମଣିଷର ସମାନ ନଥାଏ ମନ-ସୁସ୍ଥ-ଦେହ ଆୟୁ |

ସବୁ ମଣିଷର ସ୍ସୁଖ-ଦୁଃଖ ଅଛି ଅଛନ୍ତି ଜନନୀ ପିତା,

ସବୁରି ଭିତରୁ କେହି ଜଣେ ପୁଣି ହେଉଛି ଜଗତଜିତା |

ସବୁ ଅଙ୍ଗଥାଇ କେ ହୁଏ ବେକାର କିଏ ପାଏନାହିଁ ଅନ୍ନ,

ସବୁଦେଖି କିଏ ହେଉଛି ଅଦେଖା ଶୁଣେନାହିଁ ଥାଇକାନ |

ସବୁ ମଣିଷର ଆଙ୍ଗୁଠିର ଛାପ ଯେପରି ହେଉଛି ଭିନ୍ନ,

ସବୁ ସୁଖପାଇଁ କିଛି ମଣିଷର ମନ ହେଉଛି ଉଚ୍ଛନ୍ନ |

ସବୁଦିନ ଆମେ ଦେଖୁଛୁ ଦୁନିଆ କେତେଭଲ କେତେମନ୍ଦ,

ସବୁଜାଣି ଆମେ ଶିଖୁନାହୁଁ କିଛି କରୁଛୁ କପଟ ଛନ୍ଦ |

ସବୁବେଳେ ଯଦି ହୋଇବ ପ୍ରତ୍ୟକ୍ଷବାଦୀ ଆମ ଦୃଷ୍ଟିକୋଣ,

ସବୁରି କାମରେ ସକଳ କ୍ଷେତ୍ରରେ ଫୁଟିବ ମହତ ପଣ |