ଚିତ୍ର ଚରିତ - 60 କବିତା: ଦଶରୁ ଏକ

ହାତରେ ଆମ ଦଶ ଆଙ୍ଗୁଳି ପାଦରେ ପୁଣି ଦଶ,

ଅଧିକ କାମ କର କହୁଛି ମିଳିବ ନିଶ୍ଚେ ଯଶ |

ନଅଟି ଦ୍ୱାର ଖୋଲା ଦେହରେ ବାହାରି ଯାଏ ମଳ,

ଚମ ବେଢିଛି ଲୋମ କୂପରୁ ବାହାରିବାକୁ ଝାଳ |

ଛଅଟି ଶତ୍ରୁ ଲୁଚି ଅଛନ୍ତି ଆମରି ଶରୀରରେ,

ଏକା ବିବେକ ଲଢେଇ କରି ଜିତୁଛି କେବେ ହାରେ |

ଦୁଇଟି ଆଖି ଆମର ଅଛି ଦୁଇଟି ପୁଣି କାନ,

ଦେଖିବା ବେଶି ଶୁଣିବା ବେଶି ଲଗାଇ ମନ-ଧ୍ୟାନ |

ଗୋଟିଏ ପାଟି ଅଛି ଆମର କହିବା ପାଇଁ କଥା,

ଅଳପ ଆଉ ମଧୁର ଭାଷା ଲଗାଏ ନାହିଁ ବ୍ୟଥା |

ରାଗଟି ହେଲା ପ୍ରଥମ ଶତ୍ରୁ ଲୋଭଟି ତା'ର ଭାଇ,

ମଣିଷ ମରେ ମାୟା ମୋହରେ ଈର୍ଷାରେ ବୁଡ଼ିରହି |