ଚିତ୍ର ଚରିତ - 52 କବିତା: ପୂଜା
ଚିତ୍ର ଚରିତ - 52 କବିତା: ପୂଜା
ଶିବଙ୍କର ସାପ ତ୍ରିଶୂଳ ପୂଜୁଛୁ ଦୁର୍ଗାଙ୍କର ସିଂହ-ଖଣ୍ଡା,
ବିଷ୍ଣୁଙ୍କର ଚକ୍ର ଇନ୍ଦ୍ରଙ୍କର ବଜ୍ର ହନୁମାନଙ୍କର ଗଦା |
ଭୂତକୁ ପୂଜୁଛୁ ପ୍ରେତକୁ ପୂଜୁଛୁ ଆମେମନେ ଅଛି ଭୟ |
ଗୁଣ୍ଡାକୁ ପୂଜୁଛୁ ନେତାଙ୍କୁ ପୂଜୁଛୁ ପୂଜା ମିଛ ଅଭିନୟ |
ଅଫିସକୁ ଗଲେ ଡରି ମରି ଲୋକେ କରିଥା'ନ୍ତି ନମସ୍କାର,
ଓକିଲ ଡାକ୍ତର ପାଖେ ପୂଜାକରେ ଜୀବନ ଯାଉଛି ଯା'ର |
ବ୍ରାହ୍ମଣ ବାବାଜୀ ଅଜ୍ଞାନ ହେଲେ ବି ତାଙ୍କୁ କରୁଛୁ ପ୍ରଣାମ,
ପଥର ବସେଇ ସିନ୍ଦୂର ଲଗାଇ ପୂଜା କରୁ ରାତିଦିନ |
ଯିଏ ଯେତେ ଦୁଃଖ ଅଧିକ ଦେଉଛି ସିଏ ସେତେ ପୂଜା ପାଏ,
ହଇରାଣ କଲେ ଅଧିକ ମିଳିବ ଲାଞ୍ଚୁଆ ହିଁ ଜାଣିଥାଏ |
ଅସଲ ପ୍ରଣମ୍ୟ ପୂଜ୍ୟ ପିତା-ମାତା ପାଆନ୍ତି କି କେବେ ପୂଜା ?
ଗୁରୁ-ଅନ୍ନଦାତା ଆଶ୍ରୟଦାତାଙ୍କ ନାମରେ ଉଡ଼ାଉ ମଜା |
ପାଉଛୁ ଯାହାଠୁଁ ସବୁଠାରୁ ବେଶି ସିଏ ତ ପ୍ରକୃତି ରାଣୀ,
ମାଟି-ମାଆ ପୂଜା ଦେବା-ଦେବୀ ଭକ୍ତି କିଏ କରୁଛି କେଜାଣି ?