ଚିଲିକା
ଚିଲିକା
ଉତ୍କଳ ଭୁବନେ ଶୋଭାର ଭଣ୍ଡାର
ଚିଲିକା ଦୀର୍ଘିକା ରାଣୀ l
ଗର୍ଭେ ବିରାଜନ୍ତି ଜଗତ ତାରିଣୀ
କାଳିଜାଇ ଠାକୁରାଣୀ ll
କୂଳେ ବିରାଜନ୍ତି ନାରାୟଣୀ ପୁଣି
ବାଣପୁରେ ଭଗବତୀ l
କାଳିଜାଇ ସ୍ମରି ଚିଲିକାରେ ତରୀ
କୈବର୍ତ୍ତେ ବାହି ନିଅନ୍ତି ll
ତୀରେ ଅଛି ପୁଣି ଇତିହାସ ସାକ୍ଷୀ
ଗ୍ରାମ ମାଣିକ ପାଟଣା l
ମହାପ୍ରଭୁ ଖାଇ ମାଣିକର ଦହି
ଉଡ଼ାଇଲେ ଜୟ ବାନା ll
ଚଢ଼େଇ ହଗା ସେ ଗୁରୁବାଇ ଦ୍ବୀପ
ଚାହିଁ ଚାହିଁ ଉଡ଼େ ଏରା l
ଗୁପ୍ତବାସ ଜଗା କାଳିଆ ରଚିଲେ
ଇତିହାସେ ଅଛି ପରା ll
ଯବନ କଟାଳେ ମହାପ୍ରଭୁ କାଳେ
ଚିଲିକା ଗରଭେ ରହି l
କାଙ୍କଣ ଶିଖରୀ ମଣୋହି କରିଲେ
କାଙ୍କଣ ଫଳକୁ ଖାଇ ll
ଝିଅ କାଳିଜାଇ ଅମର କାହାଣୀ
କାନ୍ଦଣା ଶୁଭେ ପାହାଡ଼େ l
ସାଥି ସଙ୍ଗାତକୁ ଛାଡ଼ି ସେ ଆସିଛି
ଭାଲେରୀ ପାହାଡ଼ କଡ଼େ ll
ମାମୁଁ ଭଣଜାର କଣରୁ ଆସଇ
ବୋହି ସୁଲୁ ସୁଲୁ ବାଆ l
ଚିଲିକା ଗରଭେ ବିହଙ୍ଗ କୁଜନ
ଖେଳୁଛି ସହସ୍ର ନାଆ ll
ଜୟ ଜଗନ୍ନାଥ ଜଗତ ଜୀବନ
ଉତ୍କଳରେ ବାସ କରି l
ସୁନ୍ଦର ଗଢ଼ିଛ ଉତ୍କଳ ଭୂମିକୁ
ଜଗତ ସୁନ୍ଦର ହରି ll