ଚିଇତି ଓଠରେ ରଙ୍ଗ

ହଜିଗଲାଣି ଲୋ ବଉଳ ମହକ

କୋଇଲିର କୁହୁତାନ

ନିଦାଘର ଜ୍ୱାଳା ଦେହ ଜାଳିଦିଏ

ଛଟପଟ ହୁଏ ମନ I

ପଳାସରେ ପଛେ ମହକ ନଥାଉ

ଆଖିକୁ ନେଉଛି ଟାଣି

ଚଇତି ଓଠରେ ଚଇତର ରଙ୍ଗ

ମନକୁ ନେଉଛି କିଣି I

ବଇଶାଖ ଝାଞ୍ଜି ମାଡି ଆସିବ ଲୋ

ଜାଳିଦେବ ତରୁଡାଳ

ମଲ୍ଲୀର ମହକେ ଉଚ୍ଚାଟିତ ହେବ

ତୁମ ଗାଁ' ସଞ୍ଜବେଳ I

ରାତି ବଢୁଥିବ ତାତି ବଢୁଥିବ

 ଚଉଦିଗେ ଅନ୍ଧକାର

କାହିଁ କେତେଦୂରୁ ଭାସି ଆସୁଥିବ

ପେଚାର କର୍କଶ ସ୍ୱର I

ତୁମେ ପାଖେଥିଲେ ସହି ହୋଇଯିବ

ଖୁସିରେ ନିଦାଘ ଦାଉ

ଆଖିରେ ତୁମର ନୀଳ ନିମନ୍ତ୍ରଣ

ଓଠୁ ଝରୁଥିବ ମହୁ I

ଦେହରେ ତୁମର ଫଗୁଣର ରଙ୍ଗ

ଲାଗି ରହଥିବ ସଖୀ

ତୁମ ଗାଲେ ମୋର ପ୍ରେମର ସନ୍ତକ

ନିରବରେ ଦେବି ଲେଖି I