ଛୋଟର ବଳ
ଛୋଟର ବଳ
ପଦିଏ କଥାରେ ସଂପର୍କର ସେତୁ ଭାଙ୍ଗିହୁଏ ଛାରଖାର,
ଠୋପାଏ ବିଷରେ ଅମୃତର ହାଣ୍ଡି ପାଲଟି ହୁଏ ଜହର ।
ଟିକିଏ ହସରେ ଫଟା ହୃଦୟକୁ ଯୋଡ଼ି ଦିଆଯାଇପାରେ,
ଅଳପ ଲୁହରେ ଅକୁହା କଥାକୁ କହିହୁଏ ସହଜରେ ।
ବିନ୍ଦୁଏ ଜଳରେ ସିନ୍ଧୁ ଦେଖିହୁଏ ଜୀବନକୁ ପାରେରଖି,
ଟୋପାଏ ସିନ୍ଦୂର ସାତ ଜନମକୁ ରହିଯାଏ ହୋଇ ସାକ୍ଷୀ ।
ପାଦେ ଚାଲିଗଲେ ବାଟ କମିଯାଏ ଚକେଗଲେ ବାରହାତ,
ମୁହୂର୍ତ୍ତକ ସିନା ଅତିଛୋଟ ଲାଗେ ଖୋଲିଦିଏ ଭାଗ୍ୟବାଟ ।
ଗୋଟିଏ ଅକ୍ଷର ବଦଳାଇଦେଲେ ବାକ୍ୟର ଭାବ ବଦଳେ,
ସାମାନ୍ୟ ଦୋଷରୁ ମୃତ୍ୟୁ ହୋଇପାରେ ବଡ଼ ଅପମାନ ମିଳେ ।
ଛୋଟିଆ ଆଖିରେ ବିରାଟ ଜଗତ ସହଜେ ପାରୁଛୁ ଦେଖି,
କ୍ଷୁଦ୍ରକୀଟ ଉଈ ଗଢିପାରେ ହୁଙ୍କା ଆକାଶରେ ଉଡ଼େପକ୍ଷୀ ।
#ସିଧାକଥା