Library
ଛିଣ୍ଡାଅ ସବୁ ଶୃଙ୍ଖଳ
ଛିଣ୍ଡାଅ ସବୁ ଶୃଙ୍ଖଳ
ଛିଣ୍ଡାଇ ଶୃଙ୍ଖଳ ଉଠ ହେ ଦୁର୍ବଳ
ଜାଗ୍ରତ ହୁଅରେ ଆଜି,
ପ୍ରତିଷ୍ଠିତ କର ତୁମ ଅଧିକାର
ତୁମ ସମାଜରେ ଆଜି ।
ଏଇ ସମାଜରେ ସବୁ ମାନବର
ରକତେ ଭିନ୍ନତା ନାହିଁ
ତେବେ କୁହ ଭାଇ ଏତେ ଭେଦା ଭେଦ
ସମାଜରେ କିସ ପାଇଁ ।
ପ୍ରତି ମାନବର ରହିଅଛି ଜାଣ
ମାନବିକ ଅଧିକାର
ସବୁ ମଣିଷର ସର୍ବ କ୍ଷେତ୍ରେ ଅଛି
ସମାନତା ଅଧିକାର ।
ସବୁ ମଣିଷଙ୍କ ପାଇଁ ରହିଅଛି
ସମାନତା ଅଧିକାର
ଜାତି ଧର୍ମ ବର୍ଣ୍ଣ ଧନିକ ଦରିଦ୍ର
ଉଚ୍ଚ ନୀଚ୍ଚ ସଭିଙ୍କର ।
ସମାଜର ସବୁ ଲୋକଙ୍କର ଅଛି
ସମାନ ସମାନ ଭାଗ
ସମସ୍ତ ଆଇନ ସମସ୍ତଙ୍କ ପାଇଁ
ସମାନ ଭାବେ ପ୍ରୟୋଗ ।
ସମାଜର ସବୁ ଲୋକଙ୍କକର ଅଛି
ବଞ୍ଚିବାର ଅଧିକାର
କେହି କାହାରିକୁ ଦେଇପାରିବନି
କଷଣ କି ଅତ୍ୟାଚାର ।
ସାରା ଜଗତରେ ଗୋଟିଏ ଧରମ
ଅଟଇ ମାନବ ଧର୍ମ,
ସମାଜର ସବୁ ଲୋକ କରିପାରେ
ସମସ୍ତ ପ୍ରକାର କର୍ମ ।
କର୍ମ ଅନୁସାରେ ସଭିଙ୍କର ପାଇଁ
ପ୍ରାପ୍ୟ ଉଚିତ ମଜୁରୀ
ସେଥିରୁ କେହିବି ପାରିବନି ଠକି
ଜାଣିରଖ ଭଲକରି ।
ଯଦି କେହି ତୁମ୍ଭେ ଦେଉନାହିଁ କାହିଁ
କର୍ମାନୁସାରେ ମଜୁରୀ
ଶୋଷଣ ବିରୁଦ୍ଧେ ଲଢିବାରେ ତୁମେ
କରନାହିଁ ତିଳେ ଡେରି ।
ଲଢେଇରେ ଯଦି ପ୍ରତିପତ୍ତି ବଳେ
ପିନ୍ଧାଏ କେହି ଜଞିିର
ଛିଣ୍ଡାଇ ଦିଅ ହାତର ଜଞ୍ଜିର
ଉଠା' ପ୍ରତିବାଦ ସ୍ବର ।
ଶୋଷଣ ବିରୁଦ୍ଧେ ଲଢିବା ଅଟଇ
ତୁମ ନ୍ୟାଯ୍ୟ ଅଧିକାର
ଗଣତନ୍ତ୍ରେ ନାହିଁ ଶୋଷଣର ସ୍ଥାନ
ଉଠା' ପ୍ରତିବାଦ ସ୍ବର ।
ପ୍ରତିପତ୍ତି ବଳେ ମତ୍ତ ହୋଇ କେହି
ଯଦି ପିନ୍ଧାଏ ଶୃଙ୍ଖଳ
ଜାଗ ହେ ଦୁର୍ବଳ ପ୍ରତିବାଦ କର
ଛିଣ୍ଡାଇ ଦିଅ ଶୃଙ୍ଖଳ ।
ଧନ ଦଉଲତ ପ୍ରତିପତ୍ତି ବଳେ
କେହି କଲେ ଅତ୍ୟାଚାର
ଅନ୍ୟାୟ ଅନୀତି ବିରୁଦ୍ଧେ ଲଢିବା
ଅଟେ ତୁମ ଅଧିକାର ।
ବେଡି କରୋଡାକୁ ଡର ନାହିଁ ତୁମେ
ଭାବନାହିଁ ଦୁରୁବଳ
ସତ୍ୟ ନ୍ୟାୟ ଧର୍ମ ଅହିଂସା ମାର୍ଗରେ
ଛିଣ୍ଡାଅ ସବୁ ଶୃଙ୍ଖଳ ।
