ଛିନ୍ନ ବନ୍ଧନ

ଦୁହିତା ମୁଁ

ସ୍ନେହମୟୀ ଜନନୀ ବନିତା

କଲ୍ୟାଣ ମୟୀ ଅଟେ ଭଗିନୀ ମୁଁ ସୂତା

ତେବେ କିପରି ହେଲି ଏହି ଜଗତେ ଆଜି

କଳଙ୍କିନୀ, ପାପିନୀ, ପତିତା, ଦୁଶ୍ଚରିତ୍ରା ?

କ୍ଷଣିକ ଉତ୍ତେଜନା

ପାଶବିକ ପ୍ରବୃତ୍ତିକି କାମାନ୍ଧ

ନୁହେଁ କେବେ ଏହା ଯେ ମୋହରି ଅନ୍ତର୍ଦ୍ୱନ୍ଦ

ତେବେ ପରିସର ଭୂକ୍ତ ନୁହେଁ ଯାହା

ହେଲା କିପରି ତାର ମୋ ନାମ ସହ ସମ୍ବନ୍ଧ ?

ପାଞ୍ଚାଳୀ ଚଢ଼ିଲା ବଳୀ

ପଶା ଖେଳ ପାଶ ବନ୍ଧକେ

ପାଣ୍ଡବ କୃତ ଭୁଲ୍ ଗଣନାର ଫନ୍ଦେ

କୁରୁସଭାରେ କୁରୁ କୂଳବଧୁ ଯେ କାନ୍ଦେ l

ଅନ୍ୟାୟୀ ଦଶାନନ ପ୍ରବଳ ଅତ୍ୟାଚାର

ବଧ ହେତୁ ବିଷ୍ଣୁ ହେଲେ ବଦ୍ଧ ପରିକର

ଜନକ ନନ୍ଦିନୀ ହୋଇ ତା ଶଠତା ଶିକାର

ଚରିତ୍ର କଳଙ୍କେ ହେଲେ ଭୂମି ମଧ୍ୟେ ସ୍ଥିର l

ରାଜେନ୍ଦ୍ର କାମନା ବାଲେ ଗୌତମ ରୂପେ ଆସି

ଅହଲ୍ୟା ସମ୍ମୁଖରେ ଛଦ୍ମବେଶରେ ପ୍ରକାଶି

ପାପ ଅପରାଧ କରି ମୁକ୍ତ ଇନ୍ଦ୍ର ଅବିନାଶୀ

ପାଷାଣ ନାରୀ ରାମ ପଦେ ହେଲା ବିଶ୍ୱାସୀ l

ଶତତ ନିର୍ଭୟାର ବୁକୁ ଫଟା କ୍ରନ୍ଦନ

ଶୁଭେନି କର୍ଣ୍ଣେ କି ନ୍ୟାୟ ହୁଏନି ସନ୍ଧାନ

ଯୁଗେ ଯୁଗେ ଏଠି ଶୃଙ୍ଖଳ ଯୁକ୍ତ ନାରୀ ଶକ୍ତି

ନ୍ୟାୟ ସଂଗ୍ରାମେ ନିଜେ ନ୍ୟାୟ ହିଁ ଖୋଜେ ମୁକ୍ତି l