ଛାଡ଼ ଖାଇ

ଧରମ ମାସରେ ଗେରୁଆ ବସ୍ତ୍ରରେ

     ସରୁ ତିଳକର ଚିତା

ଭାଗବତ ଠାରୁ   କାର୍ତ୍ତିକ ପୁରାଣ

    ପୁଣି ପଢୁଥିଲି ଗୀତା ।

ନିଇତି ଆଳତି  ସଞ୍ଜ ଓ ସକାଳେ

   ଖୋଳ ଝାଞ ଗିନି ଧରି

ପୂର୍ଣ୍ଣ ହେଲା ଆଜି କାର୍ତ୍ତିକ ବ୍ରତ ମୋ

   ଆକାଶ ଦୀପକୁ ଜାଳି ।

ଅରଜିଲି ଯେତେ ପୁଣ୍ୟ ଏ ମାସରେ

    ଆକାଶ ଦୀପରେ ଭରି

ସରଗରେ ଥିବା   ବ୍ୟାଙ୍କ୍ ଲକରକୁ

    ଦେଲି ଟ୍ରାଂସଫର କରି ।

ସଞ୍ଚୟ କରିଲି    ସବୁ ପୁଣ୍ୟ ସେଠି

    ପୁଣ୍ୟ ଥାଉ ସୁରକ୍ଷିତେ

ଲକରରୁ କେବେ   ଚୋରି ହୁଏ ନାହିଁ

   ଚାବି ରହିଛି ମୋ ହାତେ ।

ଆଇଁଷ ସୁଆଦ    ପାଟିରେ ବାଜିନି

     ଅଚିକିରା ଲାଗେ ପାଟି

ପାଳିକି ରଖିଛି   ଖାଣ୍ଟି ଦେଶୀ ଗଞ୍ଜା

     କାଟିବି ଆଜି ତା ତଣ୍ଟି ।

ଯତନେ କରିବି    ମାଉଁସ ଝୋଳଟା

    ସରୁ ଅରୁଆର ଭାତ

ତା ସାଙ୍ଗକୁ ଭାଇ    ମହୁଲି ଟିକିଏ

   କିବା ବିଦେଶୀଆ କାତ ।

ମାସକ ଯାକର     ମନ ବାଞ୍ଛା ପୂର୍ଣ୍ଣ

    ହୋଇବ ଛାଡ଼ଖାଇରେ

ଯାଉ ଯେତେ ଟଙ୍କା ପକେଟୁ ମୋହର

   ସେଥିପାଇଁ ଚିନ୍ତା ନାହିଁରେ ।

ଏଇ ଭାଇ ଆମ   ଛାଡ଼ ଖାଇ ନିତି

    ପାଳୁଅଛେ ହିନ୍ଦୁ ଧର୍ମେ

ମନ ମଧ୍ୟେ ଥିବା    ଅସନା ଅଳିଆ

    ସାଇତି ରଖୁଛେ ମର୍ମେ ।

ଆଜି ଛାଡ଼ ଖାଇ   ଲକ୍ଷ ଲକ୍ଷ ଜୀବ

    ପକାଇଲେ ପ୍ରାଣବଳି

କେତେ ଲାଭ କ୍ଷତି ହିସାବ ସେଇଠି

    ଧରମ କିରତି କରି ।

ସଭିଏଁ କୁହନ୍ତି     କଥାଟି ଚିକଣ

    ପାଣି ପରେ ସର ବସେ

କାର୍ଯ୍ୟରେ କାହାର ନ ଥାଏ ଠିକଣା

    ଅପକର୍ମେ ସଦା ରସେ ।