ଚେତି ଯାଅ ଦୁଷ୍କର୍ମ କାରୀ

ଦୂର୍ଯ୍ୟୋଧନ ଯଥା ବିବସନା କରି ପାଂଚାଳୀ ବସାଇ ଜଙ୍ଘେ

ଦେଶ ସାରା ଆଜି ହୁରି ପଡିଅଛି ବଳାତ୍କାର ସୀମା ଲଂଘେ

ବ୍ୟଭିଚାରୀ ସବୁ ଯୁଗରେ ଅଛନ୍ତି ସର୍ବତ୍ର ରାଜୁତି ତାଙ୍କ

କାନୁନ ଆଖିରେ ଅନ୍ଧ ପୁଟୁଳିଟା କରିଦିଏ ନ୍ୟାୟ ବାଙ୍କ

ଦୁଷ୍କର୍ମ କରି ସେ କି ଭୋକ ମେଣ୍ଟାନ୍ତି ପ୍ରମାଣ ଉଡାଇବାକୁ

ହତ୍ୟା ପଥର ଆଶ୍ରୟ ନିଅନ୍ତି ସାକ୍ଷୀ ନମିଳେ ତାହାକୁ

ନାରୀର ଇଜ୍ଜତ ଭୁଲୁଣ୍ଠିତା ହୁଏ ଚାରି ଆଡେ ପଡେ ହୁରି

ବାହାରକୁ ଗୋଡ କାଢିବନି ଘରେ ଆଇନ ହେଉଛି ଜାରି

ଦୁଷ୍କର୍ମ କାରୀଟି ନିର୍ଭୟରେ ବୁଲେ ପୀଡିତା ଦେହରେ ଦାଗ

ମନର ଦାଗଟା ଅତି ଭୟଙ୍କର କ୍ଷତ ଦିଶେ ନାହିଁ ଆଗ

ମାଆ ଯଦି ଆଚରଣ ଉଚ୍ଚାରଣେ ଶୃଙ୍ଖଳିତ ହୋଇଥିବେ 

ଯୋଗ୍ୟ ନାଗରିକ ଏ ଦେଶ ପାଇବ ବଳାତ୍କାରୀ କାହୁଁ ଥିବେ

ବାପା ର ଶାସନ ପରିବାରେ ଯଦି ହୁଗୁଳା ହୋଇବ ନାହିଁ 

କୋର୍ଟ କଚେରୀ ଜିଅଲ ସବୁର ଲୋଡା ହେବ କାହିଁ ପାଇଁ

ସମୟ ବଦଳେ ଜନତା ମାତୁଛି କାନୁନ ହାତକୁ ନେଇ

ଦୁଷ୍କର୍ମ କାରୀକୁ ଗୋଡାଇ ମାରିବେ ଯମପୁରେ ପହଂଚାଇ

ଜୁଡୋ କରାଟେର ନିପୁଣା ଲଳନା ଅସ୍ତ୍ର ଶସ୍ତ୍ର ସୁସଜ୍ଜିତା

ମରିବା ଆଗରୁ ମାରିବା ନିମନ୍ତେ ମନେ କରିଲେଣି ଚିନ୍ତା

ସଜାଗ ହୁଅରେ ମଦ୍ୟ କବଳିତ ଇଜ୍ଜତ ଲୁଣ୍ଠନ କାରୀ

ଯୁଗ ଆସିଲାଣି ଅବଳା ଦୁର୍ବଳା ଆଉ ନହୋଇବେ ନାରୀ

ସୁଧୁରି ଯାଅରେ କୁଳାଙ୍ଗାର ଦଳ ନାରୀ ଯଦି ନ ରହିବ 

ମାଆ ବୋଲି ତୁମେ କାହାକୁ ଡାକିବ ରାକ୍ଷୀ କିଏ ବା ବାନ୍ଧିବ

ପୁରୁଷଟି ଦିଏ ନାରୀକୁ ସୁରକ୍ଷା ପିତା ଭ୍ରାତା ଭର୍ତ୍ତା ପୁତ୍ର 

ରକ୍ଷକ ଯଦି ଭକ୍ଷକ ସାଜିବ ଆଉ ଅଛି କେଉଁ ସୁତ୍ର

ଧରଣୀ କମ୍ପିବ ସାଗର ଲଙ୍ଘିବ ଆକାଶ ପଡିବ ଛିଡି

ବିପଦ ପଡିଲେ ମାଆ ମାଆ ବୋଲି କାହାକୁ ଧରିବ ଭିଡି