ଚାଲଯିବା ବୃନ୍ଦାବନ
ଚାଲଯିବା ବୃନ୍ଦାବନ
ଥକାମନ ଆଜ ଚାଲ ଯିବା ବୃନ୍ଦାବନ l
ଦର୍ଶନ କରିବା ଯାଇ ଶ୍ରୀ ନନ୍ଦନନ୍ଦନ ll
ନିଧିଵନୁ ପ୍ରଭାତରୁ ଫୁଲ ତୋଳି ଏକା l
ଥିରିଥିରି ପଥଚାଲି ଶ୍ରୀମତୀ ରାଧିକା ll
ଆସୁଥିବେ ତାଙ୍କ ପଦେ ଶରଣପଶିବା l
ଶ୍ରୀପତିଙ୍କ କଥା ଶ୍ରୀମତୀଙ୍କୁ ପଚାରିବା ll
ବାଙ୍କଚାହାଣିରେ ପ୍ରଭୁ ଶ୍ରୀବାଙ୍କେବିହାରୀ l
ନେତ୍ର ପବିତ୍ର କରିବା ତାଙ୍କେ ଅନୁସରି ll
ବାଙ୍କଅଧରେ ତାଙ୍କର ମୁରଲୀ କି ଶୋଭା l
ତ୍ରିଭଙ୍ଗୀଠାଣିରେ ଉଭା ଜନମନ ଲୋଭା ll
କାଳୀୟ ଗଞ୍ଜନ ପ୍ରଭୋ ଭକ୍ତ ଭାବଗ୍ରାହୀ l
ଶକଟାଭଞ୍ଜା ନିଶ୍ଚୟ ନେବେଟି କୋଳାଇ ll
ରାଧାକୁଣ୍ଡେ ଶ୍ୟାମକୁଣ୍ଡେ ସାରିଣ ସ୍ନାହାନ l
ପରିକ୍ରମା କରି ଯିବା ଗିରି ଗୋବର୍ଦ୍ଧନ ll
ଦ୍ଵାପରେ ଗୋକୁଳ ରଖି ପ୍ରଭୁ ଗିରିଧାରୀ l
ଛତ୍ରପ୍ରାୟ ଟେକିଥିଲେ ଗୋବର୍ଦ୍ଧନ ଗିରି ll
କେଳି କଦମ୍ବରେ ଯାଇ ପତାକା ବାନ୍ଧିବା l
ରାସକୁଞ୍ଜେ ରସରାଜ ଗୋପିବୃନ୍ଦ ଶୋଭା ll
ମଥୁରାରେ ଦେଖି ଯିବା କଂସ କାରାଗାର l
ଶ୍ରୀକୃଷ୍ଣ ଜନ୍ମିଲେ କଂସ କରିବେ ସଂହାର ll
ଉଗ୍ରସେନେ ଦେଖାଇଲେ ଶଙ୍ଖ,ଚକ୍ର ଚିହ୍ନ l
ବସୁଦେବଶିରେ ଗୋପେ କରିଲେ ଗମନ ll
ଘୋର ବର୍ଷା ଘଡ଼ଘଡ଼ି ଭୟାନକ ରାତି l
ଉଛୁଳା ଯମୁନା ପଥଦେଲା ଚିରି ଛାତି ll
ନନ୍ଦରାଣୀ ଅଙ୍କେ କୃଷ୍ଣ ବସୁଦେବ ଥୋଇ l
ବନ୍ଦୀଘରେ ପହଞ୍ଚିଲେ କନ୍ୟା ପାଲଟାଇ ll
ଗୋପ ପୁରେ ବହେ ଆଜି ମଳୟ ମରନ୍ଦ l
ଜନ୍ମାଷ୍ଟମୀ ଜନମିଲେ ଧରାରେ ଗୋବିନ୍ଦ ll
ଜୟ ଶ୍ରୀରାଧେଗୋବିନ୍ଦ ଜୟ ଦେବ ହରେ l
ଜୟ ଶ୍ରୀରାଧେ ଶ୍ରୀକୃଷ୍ଣ ମୁକୁନ୍ଦ ମୁରାରେ ll