ଚାଳନ୍ତି ଶୂନ୍ୟେ ଶବଦ

ସନ୍ଥକବି ଭୀମ ଭୋଇ

ଚାଳନ୍ତି ଶୂନ୍ୟେ ଶବଦ ଅନୁମାନ ଚିତ୍ତେ ଭେଦ

ଅକଳଣା ବାରାନିଧି ନାମ ମହିମା ଅଗାଧ । ଘୋଷା ।

ଗମ୍ୟ ନାହିଁ ଚାରିଧର୍ମ ଜ୍ୟୋତି, ଜ୍ୱାଳା, ଊର୍ମ,ଧୂର୍ମ

ବ୍ରହ୍ମା ବିଷ୍ଣୁ ଶିବ ବଣା ଏମନ୍ତ ସେ ଯେଉଁ ପାଦ ।୧।

ଯେ ରାମଚନ୍ଦ୍ର ଅନନ୍ତ କୃଷ୍ଣଚନ୍ଦ୍ର ଜଗନ୍ନାଥ

ଚାରିଯୁଗେ ଅବତରି ହୋଇ ନ ପାରିଲେ ସିଦ୍ଧ ।୨।

ଋକ୍ ସାମ ଯଜୁ ଅଥ ହ୍ଲିଂ ଶ୍ଲିଂ କ୍ଲିଂ ଯୁକ୍ତ

ଦିଗ ଆକାଶରେ ଭ୍ରମି ଲୋଡି ନ ପାଇ ବିଷାଦ ।୩।

ପୃଥ୍ବୀ ପଞ୍ଚଭୂତ ବାଇ ଜ୍ୟୋତି ତେଜ କଳା ବହି

ଚନ୍ଦ୍ର ସୂର୍ଯ୍ୟ ଉଦେ ହୋଇ ନ ପାଇଲେ ଅନ୍ତ ଆଦ୍ୟ ।୪।

ଛପ୍ନାକୋଟି ଜନ୍ତୁ ଜୀବ କରି ନ ପାରିଲେ ଠାବ

ମୁନି ତପସ୍ୟାରେ ବସି ମନରେ ହେଲେ ତବଦ ।୫।

ଅବ୍ୟକତ ବ୍ରହ୍ମ ଯେହି ରୂପ ରଚନାରେ ନାହିଁ

କହେ ଭୀମ ଅରକ୍ଷିତ ଅନାମେ ରହିଲା ଭେଦ ।୬।

ସମାପ୍ତ