ବ୍ୟତିକ୍ରମ

ମୁହୂର୍ତ୍ତକରେ କେତେ କଣ ଘଟିପାରେ ମିଳିଯାଏ, ହଜିଯାଏ, ଚହଲି ଯାଏ, ଦୋହଲି ଯାଏ 

ଯେମିତିକି ସାରା ପୃଥିବୀଟା କଡ ଲେଉଟାଏ l

ଏମିତି ତ ଗଢି ହୋଇଯାଏ କାହାଣୀ 

ରଚି ହୋଇଯାଏ କବିତା 

ସ୍ୱପ୍ନସବୁ ସାଜନ୍ତି ପ୍ରଜାପତି

ମନ ଚଢେଇ ଘୁରିବୁଲେ ନୀଳ ଆକାଶେ l

ମୁହୂର୍ତ୍ତକରେ ପୁଣି ସବୁ କିଛି ନିଶୁନ, ନିଶବ୍ଦ 

ଝଡ଼ିଯାଏ ଡେଣା ପ୍ରଜାପତିର 

ନୀଡ଼କୁ ବହୁଡେନି ଚଢେଇ l

 

ବର୍ତ୍ତମାନ ବ୍ୟସ୍ତ ବହୁଳ ଜୀବନରେ 

ସମୟର ଅଭାବ 

କିଏ କାହାକୁ ବୁଝିବ? 

କିଏ କାହା ମାନ, ଅଭିମାନ, ସୁହାଗ, ସ୍ବପ୍ନ କଥା ଶୁଣିବ? 

ମୁହୂର୍ତ୍ତକରେ ଏଇଠି ସଭିଏଁ ଆପଣାର 

ତ ପର ମୁହୂର୍ତ୍ତରେ ନିଜର ବି ସାତ ପର l