ବୁଝାମଣା

ରାଗ -ଶଙ୍କରା ଭରଣ

ଜୀବନକଦମ୍ବ ଫୁଟେ

ହସେ ବାସ ଛୁଟେ,

ମନଯମୁନା ଉଛୁଳେ

ପରିବାର ହାଟେ,

ବୁଝାମଣା ଯଦି ଥାଏ,

ସମାଜର ସର୍ବସ୍ଥାନେ

ଶାନ୍ତି ଝର ବୁହେ ।

ପରିବାର ହେଉ ଅବା

ହେଉ ସେ ସମାଜ,

ପ୍ରତିକ୍ଷେତ୍ରେ ଆବଶ୍ୟକ

ହୋଇଥାଏ ଧୈର୍ଯ୍ୟ,

କାର୍ଯ୍ୟ ସଫଳତା ପାଇଁ,

ବୁଝି ବିଚାରି କହିବା 

ଉଚିତ ଅଟଇ ।

ମନ ହେଉ ଅଛି ଘୋଡା

ମଣିଷ ଆରୋହୀ,

ବିବେକ ଲଗାମ

ଯଥା ସମୟରେ ଦେଇ

ଆତ୍ମ ନିୟନ୍ତ୍ରଣ କର

ମନ ବାଣୀ ଶରୀରରେ

ସଂଯମ ଆଚ଼ର ।

ବୁଝାମଣା ଥିଲେ

ମତ ପାର୍ଥକ୍ୟ ନ ଆସେ ,

ସମ ବିଚାର ଭାବନା

ବିଚାରରେ ମିଶେ,

ଏ ମଣିଷ ଶ୍ରେଷ୍ଠ ଜୀବ,

ସଦ ବିଚାରେ ଆଚାର

ମର୍ଯ୍ୟଦା ବଢିବ ।

ପରସ୍ପର ହୃଦ ଛବି 

ଆଚ଼ରଣେ ଦୃଶ୍ୟ,

ସୂକ୍ଷ୍ମ ନିରୀକ୍ଷଣ କଲେ

ଦେଖିବ ଅଵଶ୍ଯ,

ସମମତ ଗ୍ରହଣୀୟ,

ଶୁକଦେବ ହେଲେ 

ବିଷମୋକ୍ତି ବର୍ଜନୀୟ ।

ବୁଝାମଣା ଅଭାବରେ

ବନ୍ଧୁତା ନ ରହେ,

ଅନ୍ଧ ବୁଝାମଣା ମନେ

ବିଷ ଲେପି ଦିଏ ।

ଆମ କାୟ ମନୋବାକ୍ୟ,

ଆଚରଣେ ଉଚ୍ଚାରଣେ

ସାମ୍ୟ ଭାବ ଲକ୍ଷ୍ୟ ।

ରାଜପରିବାର ଅବା

ଦେଶର ଶାସନ-

ତନ୍ତ୍ରରେ ଏ ବୁଝାମଣା

ପ୍ରଗତି ସୋପାନ ,

ଅନୁଷ୍ଠାନେ କର୍ମଶାଳେ,

ପ୍ରେମଭାବନା ପ୍ରଦୀପ

ହୋଇ ଜ୍ୟୋତି ଢାଳେ,

ଦିବ୍ୟ ଭାବନା ପ୍ରକାଶେ,

ମହତ ବିଚାର ଆଣି

ଅଗ୍ରଗାମୀ ଦେଶେ ।

ଲକ୍ଷ୍ୟ ହାସଲ ନିମନ୍ତେ

ଉଦ୍ୟମ କରିବା,

ନିଜକୁ ଏକା ନ ଭାବି

ସାହାଯ୍ୟ ଲୋଡିବା,

ମୁଁ ବଦଳରେ ଆମେ,

ସଫଳତା ପ୍ରାପ୍ତ ହେବ

ପ୍ରତିଟି କରମେ ।

ଏ ସୃଷ୍ଟିରେ ବୁଝାମଣା

ଭାବ ଅନୁପମା,

ଏହାର ଅଭାବେ ନାଶ

ସର୍ଵସୁଖ ସୀମା,

ବୁଝାମଣାର ସନ୍ଧାନ,

ସମସ୍ୟା ନ ଉପୁଜଇ

ଆସେ ସମାଧାନ ।