ଲାଇବ୍ରେରୀ
ପ୍ରୋଫାଇଲ୍
ବୁଢ଼ୀ ଓ କୁନିପିଲା ସାନୁ
ବୁଢ଼ୀ ଓ କୁନିପିଲା ସାନୁ
1 min
325
ନଇଁ ନଇଁ ନଇଁ ବାଡିଟିଏ ହାତେ ଧରି
ଠୁକୁଠୁକୁ କରି ଯାଉଯାଉ ବୁଢ଼ୀଟିଏ
ବାବୁ ବାବୁ ବୋଲି କହି
ବାଟ କଢେ ଗଲା ରହି
ହାତ ଧରି ମୋର ସେପଟକୁ ଟିକେ
ପାରି କରିଦେବ କିଏ ।।
କିଏ ଶୁଣୁଥିଲା କଥାକୁ ତାହାର ସତେ
ଦଳ ଦଳ କରି ଲୋକ ଯାଉଥିଲେ ମାଡି
କିଛି କାଳ ଗଲା ଚାଲି
ଉଡୁଥିଲା ଧୂଳି ବାଲି
ପେଏଁ ପାଆଁ କରି କଳା ଧୂଆଁ ଛାଡି
ଗଡି ଯାଉଥିଲା ଗାଡ଼ି ।।
ଏତିକି ବେଳକୁ ସେଇ ବାଟ ଦେଇ ସାନୁ
ଚାହାଳିରୁ ତା'ର ଫେରୁଥିଲା ପଢା ସାରି
ବୁଢ଼ୀଟିକୁ ଦେଖି ଆହା
କହିଲା କି ହେଲା ମାଆ
ଯିବ ଯେବେ ଆସ ହାତ ଧରି ତୁମ
କରିଦେବି ମୁହିଁ ପାରି ।।
ପାରି ହୋଇ ବୁଢ଼ୀ ହସିଲା ମୁରୁକି ହସ
କହିଲା ବାବୁରେ ଭଲ ପିଲାଟିଏ ତୁହି
ଧନ୍ୟ ତୋର ବାପା ମାଆ
ସଦା ସୁଖୀ ହୋଇ ଥାଆ
ସତେ ତୋହପରି ଏଡ଼େ ଉପକାରୀ
କାହିଁ ତ ଦେଖିନି ମୁହିଁ ।।
ଅଚିହ୍ନା ବୁଢ଼ୀକୁ ଶେଷରେ ଜୁହାର କରି
କୁନିପିଲା ସାନୁ ଘରକୁ ଆସିଲା ଧାଇଁ
ବସି ଭାବିହେଲା ଯେତେ
ଖୁସି ହେଲା ସେତେ ସେତେ
ମନେହେଲା ତା'ର ହୋଇଛି ସେ ସୁଖୀ
ମାଆର ଆଶିଷ ପାଇ ।।
