ବସନ୍ତ ଯାଅନା ହଜି
ବସନ୍ତ ଯାଅନା ହଜି
ଋତୁରାଜ ତୁମେ ବରଷକ ପରେ
ଆସିଛ ଧରାକୁ ଆଜି ।
ତୁମ ଆଗମନୀ ବାରତା ଆଣିଛି
ମନରେ ଉଲ୍ଲାସରାଜି ।୧।
ନବ କିଶଳୟ ନବୀନ କୁସୁମେ
ସୁଶୋଭିତ ଦିଶେ ଧରା ।
ଆମ୍ବ ବଉଳର ମହକ ଛୁଟଇ
ଆକାଶ ଦିଶଇ ତୋରା ।୨।
କୁହୁ କୁହୁ ତାନେ ପିକ ଗାନ କରେ
ତୁମ ଆଗମନୀ ଗୀତ ।
ମନ୍ଦ ମନ୍ଦ ହୋଇ ବହୁଛି ମଳୟ
ହରୁଛି ସଭିଙ୍କ ଚିତ୍ତ ।୩।
ତୁମ ଆଗମନେ ପ୍ରସନ୍ନ ସଭିଏଁ
ଆସଇ ଜାଗର ଯାତ ।
ଶିବ ମନ୍ଦିରରେ ରହି ଉଜାଗର
ପ୍ରଦୀପ ଜଳେ ବହୁତ ।୪।
ଫଗୁଦଶମୀରେ ଫଗୁ ଲାଗି ହୋଇ
ବିିମାନେ ବିଜେ ଠାକୁର ।
ବାଜେ ବାଦ୍ଯମାନ ଚାଚେରି ଲୀଳାରେ
ଭୋଗ ଲାଗେ ଘର ଘର ।୫।
ଚତୁର୍ଦ୍ଦଶୀ ଦିନ ଚାଚେରି ସରିଲେ
ଅଇଘେରା ପ୍ରଦକ୍ଷିଣ ।
ଶେଷ ହେବା ପରେ ଦୋଳ ଉତ୍ସବର
ହୋଇଥାଏ ଆୟୋଜନ। ୬।
ଦୋଳମଣ୍ଡପରେ ବିଜୟ ଠାକୁରେ
ସୁସଜ୍ଜିତ ହୁଏ ଦୋଳି ।
ଫଗୁ ଖେଳ ଖେଳି ଆନନ୍ଦରେ ଲୋକେ
ହେଉଥାନ୍ତି କୋଳାକୋଳି ।୭।
ଗୋପାଳ ଯାଦବ ଗୀତ ଗାନ କରି
ହର୍ଷ ଖେଳି ବାଡିଖେଳ ।
ଜ୍ୟୋତିଷ ପଢନ୍ତି ନୂତନ ପଞ୍ଜିକା
ନବବର୍ଷ ଫଳାଫଳ ।୮।
ଦୋଳ ହୋଲିଖେଳ ରଙ୍ଗର ପସରା
ରଙ୍ଗ ପିଚକାରୀ ମାରି ।
ବସନ୍ତ ଉତ୍ସବମୁଖର ହୁଅଇ
ବାସନ୍ତିକ ପୂଜା କରି ।୯।
ଅଶୋକଷ୍ଟମୀର ରୁକୁଣା ରଥରେ
ଲିଙ୍ଗରାଜ ହରିହର ।
ଦରଶନ ଦେବେ ଏକାମ୍ର କ୍ଷେତ୍ରରେ
ରଥ ଟଣା ହେତୁ କର ।୧୦।
ଶ୍ରୀରାମ ନବମୀ ଶ୍ରୀରାମଙ୍କ ଜନ୍ମ
ଉତ୍ସବ ଘେନି ଆସିବ ।
ସ୍ଥାନେ ସ୍ଥାନେ ରାମଲୀଳାର ଆଖ୍ୟାନ
ନୃତ୍ଯ ଉତ୍ସବ ହୋଇବ ।୧୧।
ଚଇତ୍ର ମାସର ମଙ୍ଗଳ ବାରରେ
ଲୋକେ ଦେବେ ପଣା ପାଣି ।
ଶୁକ୍ଳ ଚତୁର୍ଦ୍ଦଶୀ ହିଙ୍ଗୁଳା ଉତ୍ସବ
ଦଣ୍ଡଯାତ୍ରା ହୁଏ ପୁଣି ।୧୨।
ଏକୋଇଶ ଦିନ ଦଣ୍ଡଯାତ୍ରା ପଣା
ସଂକ୍ରାନ୍ତି ପୂର୍ବ ଦିବସ ।
ମେରୁ ହୋଇ ଦଣ୍ଡ ଛପାଇ ଦିଅନ୍ତି
ଦଣ୍ଡଯାତ୍ରା ହୁଏ ଶେଷ ।୧୩।
ଶୀତ ଛାଡିଗଲା ବରଷା ତ ନାହିଁ
ଖରା ତେଜ ବେଶୀ ନାହିଁ ।
ଦିନ ବଡ ହେଲା କୋକ ଦମ୍ପତ୍ତିଙ୍କ
ଆନନ୍ଦ କେ ପାରେ କହି ।୧୪।
ପ୍ରେମ ଋତୁ ଋତୁରାଜ ତୁମେ ଆସି
ହରଷ ବାଣ୍ଟୁଛ ଆଜି ।
ସଭିଙ୍କର ପ୍ରିୟ ତୁମେ ଋତୁରାଜ
ବସନ୍ତ ଯାଅନା ହଜି ।୧୫।