ବରଷାରେ ଭିଜିଭିଜି
ବରଷାରେ ଭିଜିଭିଜି
ମାଟି ମାଆର ମୁଁ ଶ୍ରେଷ୍ଠ ସନ୍ତାନ
କୃଷକ ଘରର ପୁଅ
ବାପା ଦାଦିଠାରୁ କାମ ଶିଖିଅଛି
କର୍ମର ଗାଉଛି ଜୟ |
ହଳବୁଲା ଠାରୁ ମାଟି ହଣା ଯାଏ
ସବୁଥିରେ ଧୂରନ୍ଧର
ଖରା ବର୍ଷା ଝଡ଼ ଶୀତ କାକରକୁ
ମନରେ ନଥାଏ ଡର |
ହଳ କରୁ କରୁ ସଞ୍ଜ ଆସେ ନଇଁ
ଅଳପ ରହିଛି ବାକି
ଏହାରି ମଧ୍ୟରେ ଅଦିନିଆ ମେଘ
କୁଆଡୁ ଆସିଲା ଜାକି |
ଶୀତଳ ପବନ ବହେ ସନ ସନ
ଥରାଇଲା ଅପଘନ
ଲାଗିଛି ତ ମନ କାମ ସମାପନ
ବଳଦ ବି ଛନ ଛନ |
ଟପ ଟପ ହୋଇ ଆସିଲା ବରଷା
ହୋଇ ଓଦା ସରସର
ଲଙ୍ଗଳ ଫିଟାଇ ମଇ ବାନ୍ଧିଦେଉ
ବଳଦ ଛୁଟିଲେ ଘର |
କାଦୁଅ ମାଟିରେ ପାଦ ଚିପି ଚିପି
ଭିଜିଭିଜି ବରଷାରେ
ତରତରେ ଘରେ ଫେରିବା ବାଟରେ
ଘନ ଘୋର ଅନ୍ଧକାରେ |
ଚିକିଟା ମାଟିରେ ଖସିଗଲା ପାଦ
ପିଚା ମାଡ଼ି ଗଲି ପଡ଼ି
ପ୍ରବଳ ଥଣ୍ଡାରେ ଓଠ ଥରିଯାଏ
ବର୍ଷା ଚାଲେ ବଢ଼ି ବଢ଼ି |
ବଳଦକୁ ଦେଖି ବାପା ଧାଇଁଆସି
ଗୁହାଳରେ ବାନ୍ଧିଦେଇ
ପୁଅ ଆସିନାହିଁ ବାଇ ପ୍ରାୟ ହୋଇ
ଝାମ୍ପିଟି ମୁଣ୍ଡେ ମୁଣ୍ଡେଇ |
ଅଣ୍ଡାଳି ଅନ୍ଧାରେ ଚାଲି ଥାନ୍ତି ଖରେ
ଜଗୁ ଜଗୁ ଡାକ ଦେଇ
ସାଇଁ ସାଇଁ ବାତ ଘୋର ବୃଷ୍ଟିପାତ
ଡାକ ଜମା ଶୁଭୁନାହିଁ |
ହେବାରୁ ନିକଟ ହୋଇଗଲା ଭେଟ
ଗାଳି ଦେଲେ ଭୟଙ୍କର
ଏଭଳି ମୂର୍ଖତା ଆଉ କରିବୁନି
ନିରାପତ୍ତା ସଦା ସ୍ମର |