ବର୍ଷାର ଦୃଶ୍ୟ
ବର୍ଷାର ଦୃଶ୍ୟ
ମେଘ ସବାରିରେ ବରଷା ଆସଇ
ପବନରେ ଦୋଳି ଖେଳି
ବରଷି ବରଷି ତୃଷା ମେଣ୍ଟାଏ ସେ
ହୋଇଯାଏ ଦେହେ ବୋଳି ।
ବଇଶାଖ ନିଦାଘେ ମାଟି ମା' ଆମ
ଯାଉଥାଏ ଶୁଷ୍କ ହୋଇ
ପ୍ରକୃତି ରାଣୀ ଯେ ହସି ଉଠେ ପୁଣି
ବରଷା ଟିକିଏ ପାଇ ।
ନଦୀ, ନାଳ ସବୁ କଳ କଳ କରି
ବହେ ଆନନ୍ଦ ମନରେ
ପକ୍ଷୀଗଣ ପାଇ ବରଷାର ଛୁଆଁ
ନାଚନ୍ତି ମନ ଖୁସିରେ ।
ପହିଲି ବର୍ଷାର ଜଳବିନ୍ଦୁ ଯେବେ
ମାଟିର ଚରଣ ଛୁଏଁ
ଓଦା ମାଟିର ସେ ମହ ମହ ବାସ୍ନା
ଧରଣୀ ମହକି ଯାଏ ।
ସାରୁ ଗଛ ମୂଳେ ବେଙ୍ଗ ରଡି ଛାଡି
ବେଙ୍ଗୁଲିକୁ ଡାକେ କେତେ
ଦଉଡ଼ି ଆସଇ ବେଙ୍ଗୁଲି ରାଣୀଟି
ମିତ ବାଇବାକୁ ସତେ ।
ମୁଷଳ ଧାରାରେ ବର୍ଷିବାର ଦେଖି
ମୟୂର କରଇ ନୃତ୍ୟ
ପ୍ରକୃତି ରାଣୀ ଯେ ନୃତ୍ୟ ତା'ର ଦେଖି
ହୋଇଯାଏ କୃତ୍ୟ କୃତ୍ୟ ।
କେତେ ମନଲୋଭା ବରଷା ଦୃଶ୍ୟଟି
ଓଳିରୁ ପଡିଲେ ପାଣି
କେତେ ଅସୁମାରୀ ଫୋଟକା ଫୁଟଇ
ଉଭେଇ ଯାଏ ସେ ପୁଣି ।