Library
Profile
ବର୍ଷା
ବର୍ଷା
ଏମିତି ଏକ ବର୍ଷା
କିଛି ସମୟର ଛାପ ଛାଡ଼ି ଯାଇଥିଲା
କାହାକୁ ସବୁ ଭରି ଦେଇଥିଲା ତ
କାହାକୁ ପୁଙ୍ଗୁଳା କରି ସବୁ ଛଡ଼େଇନେଇ
ବିଚ୍ ବଜାରରେ ଭସେଇ ଦେଇଥିଲା ।
ଏମିତି ଏକ ବର୍ଷା
ସେଦିନ ଶ୍ରାବଣର ଅନ୍ଧାରିଆ ରାତିରେ
ନିଜର ବୋଲି ଥିବା ସେଇ ସ୍ମୃତି ଭସେଇ
ନିଡ଼ହରା ପକ୍ଷୀଙ୍କ ମନରେ ନୂଆଁ ନିଡ଼ ବୁଣିବାର ଉତ୍ସାହ ଭରିଥିଲା ।
ଏମିତି ଏକ ବର୍ଷା
ମିଳନ ରାତିରେ ଷୋଡ଼ଶୀର ଆଖିର ଠାଣିରେ
ତା ପ୍ରେମିକ ମନରେ ମାଦକତା ଭରି
ସରସର ଭିଜେଇ ଦେଇଥିଲା ।
ଏମିତି ଏକ ବର୍ଷା
କୁଡ଼ିଆ ଘରେ ଟପ୍ ଟପ୍ ହୋଇ ଗଳୁଥିଲା
ସେଇ ଘରେ ରହୁଥିବା ଲୋକମାନଙ୍କର
ରାତିର ନିଦ ହଜେଇ ଦେଇଥିଲା ।
ଏମିତି ଏକ ବର୍ଷା
ପିଲାମାନଙ୍କୁ ବହି ଖାତା ଚ଼ିରିବା ସିଖେଇଥିଲା
ଛୋଟ ଛୋଟ କାଗଜ ଡଙ୍ଗା ବନେଇ
ଗଳିର କାଦୁଅ ପାଣିରେ ଭସଉଥିଲା।
ଏମିତି ଏକ ବର୍ଷା
ସେଦିନ ଅମାନିଆ ହୋଇ ଯାଇଥିଲା
ଭୁଲ ବୁଝାମଣା ର ଅଡୁଆ ଶୁତାରେ
ଛନ୍ଦି ହୋଇ, ଅଲଗା ହୋଇ ଯାଇଥିବା
ଦୁଇଟି ମଣିଷଙ୍କର ଆଖିରୁ
ଝର ଝର ଲୁହ ବହି ଯାଉଥିଲା ।
ଏମିତି ଏକ ବର୍ଷା
ଯେବେ ମୋ ପଣତ ଭିଜେଇ ଦେଇଥିଲା
କାହାର ଅବାଧ ଖିଆଲରେ ହଜି
ସେତେବେଳେ ମୋ ଆଖି ଏଇ ଆକାଶ ତଳେ
ନିରୋଳାରେ ନିଜେ ନିଜ ଭିତରେ
ନିଜକୁ ଅନ୍ୟମନସ୍କତାରେ ଖୋଜୁଥିଲା ।
