ବର୍ଷା ଓ ଦିନ ମଜୁରିଆ

ପହିଲି ମୌସୁମୀ

ବରଷା ଆସିଲେ

ଝଡ଼ି ଲାଗେ ଚାରି ପାଞ୍ଚ ଦିନ,

ଗରମ ହାଉଆ

ଗୁଳୁଗୁଳି କମି

ଥଣ୍ଡା ପଡ଼ିଯାଏ ଧରା ତନ।

ଦିନ ମଜୁରିଆ

ପ୍ରମାଦ ଗଣଇ

କାମ ତାକୁ କାହିଁ ନ ମିଳଇ,

ଝଡ଼ି ବରଷାରେ

ଘରୁ ବାହାରକୁ

କ୍ଷଣେ ବି ବାହାରି ନ ହୁଅଇ।

ଅଳ୍ପ ରୋଜଗାର

ବହୁ ପରିବାର

ସଞ୍ଚୟ ଘରଟା ତା’ର ଶୂନ,

ଅଧିକ ଦାନାଏ

ନ ଥାଏ ତା’ ଘରେ

ସରେ ରୋଜଗାର ପ୍ରତିଦିନ।

ପନିପରିବାର

ମୂଲ୍ୟ ଭାରି ଉଚ୍ଚ

କିଣି ଖାଇବାକୁ ଧନ ନାହିଁ,

ଝଡ଼ି ବର୍ଷା ଚଷା

ଆନନ୍ଦ ବର୍ଦ୍ଧକ

ଦୁଃଖ ଦାୟୀ ମଜୁରିଆ ପାଇଁ।