ବରଷା ଆସିଲା

ବରଷା ଆସିଲା ହସିଲା ଧରା ,

   ସବୁଜ ଘାସରେ ଦିଶିଲା ତୋରା ।

ପୋଖରୀ କୂଅରେ ପୂରିଲା ଜଳ ,

  ଚାଷୀଭାଇ କ୍ଷେତେ କରିଲା ହଳ ।

ନାଲି ଟହ ଟହ ସାଧବ ବୋହୁ ,

    ପଡ଼ିଆ ଭୂଇଁରେ ଦିଶିଲେ ବହୁ ।  

 ଗଛଲତା ଦେହେ ଡାଳ ପତର ,

   ପୂରି ତୋଟାମାଳ ଦିଶେ ସୁନ୍ଦର ।

ଆକାଶରେ ଦିଶେ କଳା ବଉଦ ,

    ରହି ରହି ହୁଏ ବଜ୍ରଶବଦ ।

ବିଜୁଳି ମାରଇ ମେଘ ଦେହରେ ,

     ନାଚଇ ମୟୂର ବଣ ଭିତରେ ।

ବେଙ୍ଗ ରଡେ ପାଣି ଭିତରେ ରହି ,

     ଶୀତୁଆ ପବନ ଯାଉଛି ବହି ।

କଦମ୍ବ ଫୁଟିଲା ପାଚେ ଡିମିରି ,

   ଦେହରୁ ଉଭେଇ ଗଲା ଘିମିରି ।

ଗରମ ତ ଆଉ ନାହିଁ ରେ ନାହିଁ ,

    ଶୀତଳ ଏ ଧରା ବରଷା ପାଇଁ ।