ବର୍ଣ୍ଣମାଳା ଠୁ ବିବର୍ଣ୍ଣ ଜୀବନ

 ଛୁଆଦିନେ

 ଘୋଷାରୁ ଥିଲୁ ବର୍ଣ୍ଣମାଳା,

 ଏବେ ଦିନଚର୍ଯ୍ୟା

 ନିରସ ନ ହେଲେବି ଗତାନୁଗତିକ ।

 ଆକାର ଆକୃତି ହରେଇ ସାରିଥିବା

 ବର୍ଣ୍ଣରୁ ମୁକୁଳି

 ସ୍ଵର ଖୋଜିବା ବେଳେ

 ବାଟ ଓଗାଳି ବସେ ଜୀବନ ।

ସକାଳର ଖବର ପୃଷ୍ଠାରେ

ସେଇ ଦୁର୍ଘଟଣା, ଦୁଷ୍କର୍ମ, ରାଜନୀତି

ମହାନଦୀ ଚିନ୍ତା । ଏପଟେ

ଟ୍ରାଫିକ ଭିଡ଼, ଇଣ୍ଟରନେଟ ସ୍ଲୋ ।

ଧେତ୍ .....

ପଞ୍ଜୁରୀ ଭିତରୁ ମୁକୁଳିବା ବାଟ

ସରୁ, ଦୀର୍ଘ, ଅନ୍ଧାର ।

 କ୍ଷୀରସିନ୍ଧୁଶାୟୀ ବିଷ୍ଣୁ ହୁଅନ୍ତୁ କି

 ନିର୍ବାସିତ ଆଲେକଜାଣ୍ଡାର ,

 ଜୀବନଠୁ ଏକ ନିରାପଦ ଦୂରତା

 ଜୀବନଠୁ ଏକ ଯନ୍ତ୍ରଣା ସିକ୍ତ ନିର୍ବାସନ

 ହିଁ ତ

 ନିର୍ଜୀବ ବୀଣାରେ ସାତ ସ୍ଵର ତୋଳେ,

 ଶବ୍ଦ ଫୁଟେ, ବାସେ

 ମହକାଏ ଅନନ୍ତ କାଳକୁ ।

 ବିବର୍ଣ୍ଣ ଲାଗୁଥିବା

 ଜୀବନ ଭିତରେ ସନ୍ଧାନ ମିଳେ

 ରଙ୍ଗର ଫରୁଆ ।।