ବର୍ଣ୍ଣବିଭା
ବର୍ଣ୍ଣବିଭା
ଅ ଯାଇଥିଲା ଅଙ୍ଗନବାଡି
ଆ ଟାଣୁ ଥିଲା ଗାର
ଇ ପଢୁଛି ଇଂରାଜୀ ବହି
ଉ କୁ ହୋଇଛି ଜ୍ୱର।।
ଋ ବସିଛି କବାଟ ଖୋଲି
ଏ ବାଟକୁ ଚାହିଁ,
ଏ ଆସିଲା ସାଥିରେ ନେଇ
ନୂଆ ଗପ ବହି।।
ଐ ଯାଇଥିଲା ବଜାର ବୁଲି
ଓ ବସିଛି ଋଷି
ଔ ପଢୁଥିଲା କବିତା
ଗୋଟେ ମନକୁ ମନ ବସି।।
କ ଯାଉଛି କଟକ ବୋଲି
ଖ ର ମନ ଖୁସି
ଗ କହିଲା ଗରମ ହେଲେ
ପି ବୁ ରାବିଡ଼ି ଲସି
ଘ ଆଖିରେ ଆଖିଏ ନିଦ
ଢୁଳାଏ ଘରକୁ ଆସି।।
ଚ ଛ ଦୁହେଁ ଯାଆଁଳା ବୋଲି
କରନ୍ତି ନାହିଁ କଳି
ଜ ଯାଉଛି ଝ ପାଖକୁ
ଖେଳିବ ବୋଲି ଦୋଳି।
ଟ ଧରିଛି ମିଠେଇ ଗୋଟେ
ଠ କରୁଛି ଅଳି
ଠ ର ମା ଆଣି ଦେଲା
ତା ପାଇଁ ମିଠା କୋଳି।
ଡ଼ ଭସାଏ କାଗଜ ଡ଼ଙ୍ଗା
ଢ ବଜାଏ ଢୋଲ,
ଆକାଶେ ଦେଖ ବିଜୁଳି ଆସି
ଫୁଟେଇ ଦିଏ ବାଣ।
ଣ କରିଛି ଦୋକାନ ଗୋଟେ
ବିକୁଛି ତେଲ ଲୁଣ।
ତ ଖାଉଛି ତତଲା ଭାତ
ଥ କୁ ଭାରି ଥଣ୍ଡା
ଥ ଥରୁଛି ଥଣ୍ଡାରେ ବୋଲି
ଦ କୁ ଲାଗେ ଡର,
ଦ ଧରିଛି ଧ ର ହାତ
ଭୁଲିକି ଆପଣା ପର ।
ନ କହୁଛି ନଈକୁ ଯିବ
ପ ପଛରେ ଧାଇଁ
ଫ ବସିଛି ଦାଣ୍ଡ ଦୁଆରେ
ତାଙ୍କ ଫେରିବା ବାଟ ଚାହିଁ।।
ବ ଟା ଆମ ବଳୁଆ ସିନା
ଭ ଟା ବୁଦ୍ଧିମତୀ
ମ କୁ ଦେଖ ମନୁଆ ବୋଲି
ଯ ପରା ତା ସାଥି।।
ର ଯାଉଛି ରକେଟ ଚଢି
ଳ କୁ ନେଇ ସାଙ୍ଗେ
ଶ ଷ ସ ତିନି ଭଉଣୀ
ବୁଲନ୍ତି ନାନା ରଙ୍ଗେ।।
ହ ର ରଙ୍ଗ ହଳଦୀ ବୋଲି
କ୍ଷ କରିଛି ମାନ
ୟ ଆସିଛି ଲ ସାଙ୍ଗରେ
ନେଇକି ମିଠା ପାନ।।