ବନସ୍ତେ ଡାକିଲାନି ଏସନ ଗଜ

ଶୁଣିଲି ସୁମଧୁର ଗୀତଟିଏ ଦୂର ଦର୍ଶନ ପରଦାରେ ,

ବନସ୍ତେ ଡାକିଲା ଗଜ ପୁଣି ଆସିଛି ରଜ ବରଷ ପରେ ,

ଆଜି ହେବା ସଜବାଜ ଲୋ ପହିଲି ରଜ କାଲି ଆସେରେ ,

ମନ ହେଲା ଛନ ଛନ ବୁଲିଗଲି ଆମ ସାହିରେ । ୧ 

ସୂଚନା ପାଇଲିନି କେଉଁ ଜଣଙ୍କ ଘରେ ,

ହେଉନଥିଲା ଗୁଣ୍ଡ ଜିରା ଲଙ୍କା ଶୀଳରେ ,

କିଏ କରିବ ଆଜିକାଲି ଚଳିଯାଏ ଦୋକାନ ଖରିଦା ପକେଟରେ ,

ସମ ଦଶା ପାଇଲି ହଳଦୀ ବଟା ପ୍ରଥା ସଜବାଜ ଦିନରେ ।୨

ଦାନ୍ତ କାଠି କଟା ପାଇଁ ଆଉ ବୁଢ଼ୀ ମା ଯାଇନି ,

କୁହେ ବ୍ରସ ଯୁଗରେ ସେ ଗୁଡାକ ହଜିଗଲାଣି ,

କଦଳୀ ପାଟୁଆ ଆଉ ସଜା ହୋଇନି ,

ପୁରୁଣା କଥା ହିଲି ପିନ୍ଧିବା ଛାଡି ଭୂଆଶୁଣି ପାଟୁଙ୍ଗା ଜମା ପିନ୍ଧିବନି । ୩

ପୋଡ଼ ପିଠା ପାଇଁ କଦଳୀ ପତ୍ର ଅଙ୍ଗାର ଘଷି ଫେଡା ଲୋଡ଼ା ପଡୁନି ,

ଓଭନ ପ୍ରେସର ନନଷ୍ଟିକରେ ସେ ପୋଡ଼ପିଠା ସ୍ୱାଦ ଆଉ ମୋତେ ମିଳୁନି ,

ଗାଁ ଝିଅ ରଜରେ ସାହି ପଡିଶା ବୁଲୁନି ,

ହୁଆଟସାପ ଫେସଵୁକ ଟିକିଟକରେ ମନ ବୁଡ଼ିଲାଣି । ୪

ଲୁଡୁ ବାଗୁଡି କବାଡ଼ି ଖେଳ ହେବନି ସତରେ ,

ଗାଁ ଟୋକା ବୁଡିଯାଇଛି ମୋବାଇଲ ଚାଟିଙ୍ଗରେ ,

ଆମ୍ବ ତୋଟା ନାହିଁ ଦୋଳି ଝୁଲିବାକୁ ସାଙ୍ଗରେ ,

ପ୍ଲାଷ୍ଟିକ ରାଶି ଟାଙ୍ଗି ଗୀତା ଭଉଣୀ ଝୁଲେ ବାଲକୁନିରେ । ୫

ରଜ ପାଳନ ହୁଏ କାହିଁକି ଜାଣେନି ଝିଅଟିଏ ,

ପଚାରିଲେ କୁହେ ରୁହ ଇଉଟୁବ ଗୁଗୁଲ ଖୋଜି କହୁଛି ଟିକିଏ ,

ତେଣେ ପାଦରେ ନାହିଁ ଅଳତା ଗାରଟିଏ ,

ତଥାପି ମୁଁ ରଜର କୁମାରୀ ଜିନ୍ ଟପ ପିନ୍ଧି କୁହେ ଓଡ଼ିଆ ଝିଅଟିଏ । ୬