ବଣରେ କରିବା ଭୋଜି
ବଣରେ କରିବା ଭୋଜି
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ଆସ କୁନି କୁନା ଆସ ମୁନି ମୁନା
ବଣରେ କରିବା ଭୋଜି,
ହସିବା ଗାଇବା ନାଚିବା ହରଷେ
ସାଙ୍ଗସାଥି ମେଳେ ମଜି ।
ଶୀତୁଆ ପବନ ବହୁଥିବ ଧୀରେ
ଦେହ ଯାଉଥିବ ଥରି,
ଯତନରେ ଆମେ କରିବା ରୋଷେଇ
ଭାତ, ଡାଲି ,ତରକାରୀ ।
ଗାଧୋଇବା ଆମେ ଝରଣା ପାଣିରେ
ଚଢିବା ପାହାଡ ଧୀରେ,
କେତେ ଜାତି ପକ୍ଷୀ ଗାଉଥିବେ ଗୀତ
କିଚିରି ମିଚିରି ସୁରେ ।
ବାଘ, ଭାଲୁ, ହାତୀ, ହରିଣ, ଠେକୁଆ
କରୁଥିବେ କେତେ ମଜା,
ଶୁଭୁଥିବ ଦୂରେ ସିଂହ ଗରଜନ
ବଣ ରାଇଜର ରଜା ।
ପୁଚ୍ଛକୁ ହଲାଇ ନାଚୁଥିବେ ରଙ୍ଗେ
ମୟୂର ମୟୂରୀ ବଣେ,
ହରିଣ ହରିଣୀ ମାରୁଥିବେ ଡିଆଁ
ଦେଖୁଥିବା ଖୁସି ମନେ ।
ଶାଳ, ପିଆଶାଳ, ଶାଗୁଆନ ପୁଣି
ନାନା ଜାତି ଗଛଲତା,
ବାଣ୍ଟୁଥିବେ ଛାଇ ମଥାକୁ ହଲାଇ
ସତେ କି ଶାଗୁଆ ଛତା ।
ଠାବେ ଠାବେ ପୁଣି ସୂରୁଜ କିରଣ
ଛୁଇଁ ଯାଉଥିବ ଦେହ,
ଦିନ ଗଡୁଥିବ ମନ ଝୁରୁଥିବ
ଲାଗି ଯାଉଥିବ ମୋହ ।
ଇଚ୍ଛା ହେଉଥିବ ପଶୁପକ୍ଷୀ ମେଳେ
ତୋଳିବାକୁ ଛୋଟ ଘର ,
ମନ କହୁଥିବ ଶୁଣିବାକୁ ନିତି
ଝରଣାର କୁଳୁ ସୁର ।