ବନମାଳୀ ବିଜେ ଏବେ

ବନମାଳୀ ବିଜେ ଏବେ ଯମୁନାକୂଳେ,

ରାଧିକେ ଅଛନ୍ତି ତହିଁ ଗୋପିଙ୍କ ମେଳେ ।

କୁରଙ୍ଗୀ ହୋଇଛି ଛିଡ଼ା,

     ହଂସ କରୁଛନ୍ତି କ୍ରୀଡା

ଆନନ୍ଦରେ ଯମୁନାର ଜଳ ଉଛୁଳେ ।

ବନମାଳୀ ବିଜେ ଏବେ ଯମୁନାକୂଳେ ।

ଯୁଗଳ ମୂରତି ଦେଖି ,

ପରିହାସ କରି ସଖି

    କହନ୍ତି-ଗୋ ଚନ୍ଦ୍ରମୁଖୀ,

    ମନେ ଆଉ ପଡ଼ିବୁକି-

ମୋହନଙ୍କ ସଙ୍ଗ ଏବେ ଲଭିଲ ହେଳେ ।

ବନମାଳୀ ବିଜେ ଏବେ ଯମୁନାକୂଳେ

କହୁଥିଲ କେତେ କରି,

ଆଗୋ ପ୍ରିୟ ସହଚରୀ

    ହୋଇଲିଣି ଏତେ ସରି,

    ଭେଟାଅ ମୁରଲୀଧାରୀ,

କୃତଜ୍ଞ ରହିବି-ଦେଖି ଶ୍ୟାମଙ୍କୁ ଡୋଳେ ।

ବନମାଳୀ ବିଜେ ଏବେ ଯମୁନାକୂଳେ

ମନମୋହନଙ୍କ ପାଶେ,

ମଜ୍ଜିଯାଅ ପ୍ରେମ ରସେ

      ଆମ୍ଭେ ଯାଉଅଛୁ ବାସେ,

      ଧରା ହେବୁ କାଳେ ଦୋଷେ-

ଆମଲାଗି ହୃଦେ ସ୍ଥାନ ରଖିବ ତିଳେ ।

ବନମାଳୀ ବିଜେ ଏବେ ଯମୁନାକୂଳେ