ବନ୍ଧୁମିଳନ

ବେଶ୍ ଖୁସି ଲାଗେ ଜାଣି ହୁଏ ନାହିଁ

କଟିଯାଏ କେମିତିକା ଦିନ

ବରଷକ ଥରେ ବା ବହୁ ବର୍ଷ ପରେ

ଯେବେ ହୁଅଇ ବନ୍ଧୁମିଳନ l

ଶୀତ ଦିନେ ପରା ପ୍ରାୟତଃ ସବୁଠି

ବନ୍ଧୁମିଳନ ହିଁ ହୋଇଥାଏ

ନାନା ଦର୍ଶନୀୟ ସ୍ଥାନ ମାନଙ୍କରେ

ଏଥିପାଇଁ ବହୁ ଭିଡ଼ ହୁଏ l

ବୟସ୍କ ହୁଅନ୍ତୁ ଅବା ବଡ ପିଲା

ହେଉପଛକେ କୁନି ବାଳୁତ

ବନ୍ଧୁମିଳନରେ ଆଗ୍ରହର ସହ

ସବୁ ହୁଅନ୍ତି ପରା ଜଡିତ ।

କିଛି ବନ୍ଧୁ ଏହି ମିଳନ ପୂର୍ବରୁ

ଦାୟିତ୍ୱର ଭାର ହାତକୁ ନେଇ

ବନ୍ଧୁମାନଙ୍କଠୁ ଟଙ୍କା ସେ ଗୋଟେଇ

ଆୟୋଜନ ପରା କରନ୍ତି ସେଇ ।

ସୁଦୂର ବନ୍ଧୁଙ୍କୁ ଦେଖିବା ସହିତ

ସୁଖଦୁଃଖ କଥା ବାଣ୍ଟିଥାଉ

ନୂଆ ଜାଗା ବୁଲା ଫଟୋ ଉଠା ସହ

ଭୋଜିଭାତ କରି ଖାଇଥାଉ l

ଅତୀତର ଦିନ ବା ବନ୍ଧୁମିଳନ

ସ୍ମୃତି ହୋଇ ରହେ ଏ ମନରେ

ରୂପା ଜହ୍ନ ପରି ସ୍ମୃତି ଖୁସି ଦିଏ

ଯେବେ ମନେପଡେ ଏକାନ୍ତରେ l

ବନ୍ଧୁମିଳନର ସୁଯୋଗ ମିଳିଲେ

ହାତଛଡା କେବେ ନ କରିବା

ଯେତେ ଦୂରେ ଥିଲେ ସମୟ କାଢ଼ିକି

ବନ୍ଧୁମିଳନରେ ଯୋଗଦେବା ।