ବନ୍ଧୁ ମୋ ଆତ୍ମାରେ

   

ବନ୍ଧୁତା କେବଳ ଗୋଟିଏ ତାରିଖର ମୋହତାଜ଼ ନୁହେଁ

ସେ' ତ ଆତ୍ମାର ଅତୁଟ ବନ୍ଧନ

ଯା'ର ସ୍ନେହ-ଫଲ୍ଗୁ ପ୍ରବାହିତ ଆମ ପ୍ରତିଟି ଶିରା ପ୍ରଶିରାରେ..

ବନ୍ଧୁତା କେବେ ଧାର୍ ଧାରେନି ଦେବା ନେବାରେ

ସେ' ତ କେବଳ ଦେଇ ଜାଣେ ହରିଶ୍ଚନ୍ଦ୍ର, କର୍ଣ୍ଣ ପରି

ଯା'ର ସ୍ନିଗ୍ଧତା ସଞ୍ଚରୁଥାଏ ହୃଦୟ-ବୀଣାର ପ୍ରତିଟି ତନ୍ତ୍ରୀରେ..

ବନ୍ଧୁତା ଫସି ପାରେନି ସନ୍ଦେହର ଅଡ଼ୁଆ ଜାଲରେ

ସେ' ତ ବାନ୍ଧି ହୁଏ ବିଶ୍ୱାସ ଭରସାର ଟାଣୁଆ ସୁତାରେ

ଯା'ର କୋମଳ ଆବେଗ ଅନୁଭୂତ ହୁଏ ପ୍ରତିଟି ସ୍ପନ୍ଦନରେ...

ବନ୍ଧୁତା ନିଦାଘେ ଶୀତଳ ଚନ୍ଦନ

ସେ' ତ ଶ୍ରେଷ୍ଠତମ ଅନୁଭବଟିଏ;

ବଖାଣି ହୁଏନି ଯାହାକୁ ଭାଷାରେ

ସେ' ଯେ ଈଶ୍ୱରଙ୍କ ପ୍ରତିବିମ୍ବଟିଏ ।