ବନ୍ଧୁ ବଳିଆର ଭୁଜ

ରଥ ପଥ ସବୁ ଚାହିଁ ରହିଛନ୍ତି

ତୁମ ଆସିବାର ବେଳ

କେତେବେଳେ ପ୍ରଭୁ ଟାହିଆ ହଲେଇ

ପହଞ୍ଚିବ ଭକ୍ତ ମେଳ l

ଆକୁଳେ ପ୍ରଣମି ଡାକନ୍ତି ଭକତେ

ପାଶେ ଆସ ମହାବାହୁ

ଅନେକ ଦିନରୁ ମିଳିନି ଦର୍ଶନ

ବେଳ ଗଡ଼େ କହୁ କହୁ l

କୋଭିଡ୍ କରାଳେ ଦୁଇ ବର୍ଷ କାଳ

ବିନା ଭକ୍ତେ କଲ ଯାତ

ସାରା ବିଶ୍ୱ ଆଜି ଚାହିଁଛି ତୁମକୁ

ମହାବାହୁ ଜଗନ୍ନାଥ l

ପତିତ ଜନଙ୍କୁ ଉଦ୍ଧାରିବା ପାଇଁ

ରଥ ପରେ ଦିଅ ଦେଖା

ସହସ୍ର ଶ୍ରଦ୍ଧାଳୁ ରହିଛନ୍ତି ଚାହିଁ

ତୁମ ଭଳି ନାହିଁ ସଖା l

ବିପଦେ ଆପଦେ ହେଇଥାଅ ସାହା

ବନ୍ଧୁ ବଳିଆରଭୁଜ

ଭାଇ ଭଉଣୀଙ୍କୁ କରିଛ ଭରସା

ରଥ ପରେ ହେଇ ସଜ l

ସମ୍ପର୍କର ବାର୍ତ୍ତା ସଂସାରେ ବାଣ୍ଟୁଛ

ମାନବୀୟ ଲୀଳା କରି

ମାଉସୀର ସ୍ନେହେ ବନ୍ଧା ପଡ଼ି ଅଛ

ଧନ୍ୟ ଧନ୍ୟ ହେ ଶ୍ରୀହରି l

ଦେଉଳୁ ବାହାରି ଦାରୁ ଦେବତାହେ

ଦୟାକରି ଦୃଷ୍ଟି ଦେବ

ପତିତ ପାମର ଏ ଅଧମ ନର

ବନ୍ଧନରୁ ମୁକ୍ତ ହେବ l

ତିନି ରଥ ତୁମ ତାଳଧ୍ଵଜ ବଡ଼

ଭାଇ ବଳଭଦ୍ରଙ୍କର

ନନ୍ଦିଘୋଷେ ରହି ନୀଳାଚଳିଆ ହେ

ଯିବ ଗୁଣ୍ଡିଚା ମନ୍ଦିର l

ଭଉଣୀ ସୁଭଦ୍ରା ଏଡିକି ଗେହ୍ଲେଇ

ଚଢ଼ି ଦର୍ପ ଦଳନରେ

ଘୋଷ ଯାତ୍ରା କରି ଦର୍ପ ବି ନାଶିବେ

ମୁକତିର ପଥ ପରେ l

କରୁଛି ପ୍ରଣାମ ହୀନ ନରାଧାମ

ପଦ୍ମ ପାଦେ ଦିଅ ସ୍ଥାନ

ଆତ୍ମା ପରମାତ୍ମା ମହାମିଳନ ରେ

ଉଲ୍ଲସିତ ହେବ ପ୍ରାଣ l