ବିଶ୍ବକର୍ମା

ବିଶ୍ବକର୍ମା ପୂଜା   ଲାଗେ ଭାରି ମଜା

    ପଲ୍ଲୀରୁ ସହରେ ହୁଏ

ପୂଜା ମଣ୍ଡପର   ଶୋଭାକୁ ବଢ଼ାଇ

    ସାଜ ସଜ୍ଜା କରାଯାଏ ।୧।

ଶରତ ୠତୁରେ   ଆଶ୍ବିନ ମାସରେ

    ଭକତି ଭାବନା ନେଇ

ତୁମ ନାମ ଧରି   ଗୁହାରି କରୁଛି

    କରୁଣା ପାଇବା ପାଇଁ ।୨।

ବିଶ୍ବ ବ୍ରହ୍ମାଣ୍ଡର   ଶ୍ରେଷ୍ଠ କାରିଗର

    ପ୍ରଭୁ ବିଶ୍ବକର୍ମା ନାମ

ଶିଳ୍ପ ଭାସ୍କର୍ଯ୍ୟର   କଳାରେ କୁଶଳୀ

    ଚମତ୍କାର ତୁମ କାମ ।୩।

ଯନ୍ତ୍ରୀ ମାନଙ୍କର.  ମୁଖ୍ୟ ଯନ୍ତ୍ରୀ ଅଟ

    ଅସୀମ ତୁମର ଶକ୍ତି

କର୍ମ କରିବାର   ପ୍ରେରଣା ଯୋଗାଅ

    ଆଳସ୍ଯରୁ କର ମୁକ୍ତି ।୪।

ଦେବ ଲୋକଠାରେ   ଯାହା କରିଅଛ

    ଦୟାମୟଙ୍କ ଇଛାରେ

ମର୍ତ୍ତ୍ଯକୁ ସରଗ   କରିଦିଅ ଥରେ

    ଆସ ଏ ଧରା ଧାମରେ ।୫।

ସୃଷ୍ଟି କରିବାର   କାରିଗରି ବିଦ୍ଯା

    ଆୟତ୍ତ କରିବା ପାଇଁ

ତୁମରି କରୁଣା   ପାଇବା ଆଶାରେ

    ଭକ୍ତ ରହିଛନ୍ତି ଚାହିଁ ।୬।